جديد

29‏/12‏/2012

ماتخافيش




لو ألف مليون م العِدا

اتجمعوا..

وحوطوكي بشرهم

وحقدهم

وغلّهم

ماتخافيش

راح أكون

صلاح الدين

أفرد بِضلي

فوق شموس كتافك

وارمي بشالي

فوق رموشك

وامسح الأحزان بإيدي

واضم قلبي

لقلبك كمان



لو ألف مليون

م العدا

لفوا ايديكي

بألف قيد

بيحسبوكي من العبيد

ماتخافيش

راح أكون قطز

واطرد تتارهم

والمغول

واحبس كمان الغول

جوه قمقم جهلهم



لو مطرت سما حقدهم

بالقنابل

والبارود

لو غرقوكي

ف ألف نيل

ماتخافيش

راح اكون تابوت

هاادفن الأوهام

واحنطها

لميت مليون سنه لقدام




لو قطعوكي

 ألف حتة

و وزعوا جسمك

على مليون مكان

ماتخافيش

راح اكون ايزيس

واجمع سنابل

فرحتك من بين

دموع فرح الولاد

هااكون عنوان أمل

وسط كراريس الولاد

وضفيرة طايرة ماسكة

شعر احلى البنات



راح اكون آذان

نسمعه

وتردده كل الطيور

والشجر والعيدان

راح اكون أنا

مصري يصد الريح

بقلبه عشان

يوم ما تخافيش

****
نور الحرف
منى

ليه بتداري



ليه

 بتداري الضحكة عنيك

ليه بتخبِّي فرحة قلبك

ياما كتير وكتير حواليك

وبيتمنوا حلاوة حبك

داري براحتك

أنا راضي بس صراحتك

مع قلبي ومع إحساسي

داري براحتك

انا عارف إني جرحتك

على قلبك كنت القاسي



بتداري دموعك عنِّي

قرب مني وطمنني

هات إيدك جوه ف حضني

هات عينك وخد النني

يمكن لما تشوفني

تعرف إن أنا مش ناسي

داري براحتك

أنا راضي وبس صراحتك

مع قلبي ومع إحساسي

داري براحتك

أنا عارف إني جرحتك

على قلبك كنت القاسي



داري وداري عليا وداري

واسهر لك ليلي ونهاري

وامشي لك كده مشواري

وباقيد حبك من ناري

من قلبي لغاية قلبك

داري براحتك

أنا راضي وبس صراحتك

مع قلبي ومع احساسي

داري براحتك

أنا عارف إني جرحتك

على قلبك كنت القاسي

****
نور الحرف
منى 


25‏/12‏/2012

أيوه ..قولت



أيوه قولت

انا مش باحبِّك

ولا قلبي مال لقلبك

مش هاتسهر يوم عينيا

ولا هاتدمَّع عليكي

ولا راح تشتاق ايديا

يوم من الأيام ايديكي

مش باحبِّك



كونتي فاكراني باحبِّك

قلبي كان بيخدعك

رامي بعدك ذكرياتي

كل أحلامي ف حياتي

كان ضميره يودعك

لا كان في باله ينادي حبك

ولا كان ف باله يرجعِك



حلمِك في يوم

لو كان في حبي

ماتحلميش

شوقِك يزيد

أو شوق جديد

ماتشتاقيش

طريق هانمشي فيه سوا

أبدا مفيش



قلبي وروحي

وكل بوحي

مش عشانِك

لو خطوة جاية

 ف سكتي

يحرم حنانِك

ماتحلميش إني

هااموت جوه

 ف كيانِك

انا كل ايامي خلاص

نسيت مكانِك

نسيت مكانِك

***
نور الحرف
منى