مين فينا يبتدي !!

مش مهم

مين اللي فينا يبتدي

ينسى العناد

مين اللي يبدأ بالكلام

والسلام

وكفاية ع العين السهاد

ولا برضو ها ننتظر

لما بنموت م السؤال

مين اللي كان الحق عنده

ومين يعانده

ما ننتهيش من ده السؤال

مين اللي كان بيحلا

نومه مابين رموشي

مين اللي كان كل الكلام

جوه قلبي ما يحوشوشي

مين اللي كانت نظرته

تحضن كياني... وماالمسوشي

مين اللي همسه من شفايفه

قلبي يرقص....

كل كوني ما يساعوشي

يالا ننسى

 أي جرح صاب قلوبنا...

 منا فينا

يالا نبعد كل حزن

يبات ف ليله ....

 بين إيدينا

يالا يزرعنا الأمل

جوه العيون ....

ويلاقينا

يالا نحضن حبنا

ما بين قلوبنا

بينادينا

&&&&

نور الحرف

منى

آه ياهابيل

آه ياهابيل

وآه..يامليون هابيل

وكإن آدم مش أبونا

وصدر حوا كان عليل

مين اتقتل ومين قتل

مين اللي بايديه العِلل

مين اللي دمه

 نبِّت الشوك الطويل

مين اللي جرحه

سال على .... مليون سبيل

وسمعنا صرخة أمنا

ازاي ....وفين ؟

ياولادي ليه

قسوة قلوبكم ....

.جات منين

والأوردة

بقيت جشع

مهما ارتجع

الدم عمره ما يتنزع

من العروق

ويارييت نفوق

آدم ابونا كلنا

وحوا شجرة تضلنا

يارييت يموت فينا قابيل

يارييت نحب بعضنا

يدفن غرابنا كل خوف

جاي مننا

نحلم سوا

بزمن مافهشي ولا قابيل

ولا دم سايل واتهدر

ونقول قدر..

لو مات هابيل

*********

نور الحرف

منى

باكلم روحي

وييجي الليل بأشواقي

وباكتب لك

واحن اليك ف أوراقي

وبابعت لك...

حروف شوقي...

تقول أكتر

وييجي الصبح متعطّر

ولما القاك قصاد عيني

واقولك... كل ما تجيني

بِحُبَّك ....يالا طمنني

أقول عنك لروحي كلام

وينساني ف هواك

اللوم

ترد الروح :

 تقول ياسلام !!

على قلبي

اللي بات محروم

غيابك كان محيرني

ولو طوّل غيابك يوم

دا بُعدك عني سهرني

تعالى نضم اشواقنا

ندوِّنها في اوراقنا

ونكتب كل صفحاتها

بكلمة حب تشتاقنا

نسيب صفحة عتاب فاضية

مانحتاجهاش

وصفحة للبعاد

برضو مابينا بلاش

نخلي كل صفحاتنا

لشوقنا حروف

ونمسح كل تنهيده

ودمعة خوف

وننسى كل أحزاننا

ف حضن يضم أشواقنا

******

نور الحرف

منى 

هاتلاقيني

هاتلاقيني

 ف كل كلمة قلتهالك

جوه حرف ف وسط سطر

فات إيديا ف لحظه جالك

جوه نظرة عين لعين

دايبه  ف وصالك

هاتلاقيني

حتى لو مش بتناديني

هاتلاقيني

جوه شوقك

جوه دمك... وف عروقك

جوه صمتك... جوه همسك

جوه ليلك... وف شروقك

لو لقانا كان مقدّر

أو فراقنا كان مقدر

اللي مابينك وبيني

جوه قلبك ..جوه عيني

هاتلاقيني

هاتلاقيني

جوه ضحكة وابتسامه

دمعه جوه العين

زمان سابت علامه

نبضه جوه القلب

وبنسمعها ياما

همسه دايبه

جوه منا م النهارده

لحد ماتقوم القيامه

*****
نور الحرف

منى 

نفسي

نفسي أشبّ ويطْوَل عودي

يطرح قلبي ورد خدودي

نفسي أطول النجم العالي

كده طوالي

مهما أشبّ ولسه صغير

نفسي بقلبي أناجي القمرة

تيجي تنّور

كده أحلامي

وامسك كل حروف الكلمة

وارسم قلب

بنبض كلامي

شُفت كلامي

كله ملخبط جوه حروفي

شُفت الباب وقدرت أخبط

كده بكفوفي

 

يالا تعالي

يانجمه بتحلم كده في العالي

هنسى معاكي حكاية شوفي

نفسي أكون الضحكة الطارحة

جوه سمايا

نفسي اتحدى الدمعة النازله

ف قلب بكايا

نفسي أطير بجناج أحلامي

لهنا أيامي

وتجري معايا

والقى حروف العالم قادره

ترد ورايا

هاكبر واكبر ومفيش حاجه

تزلّ خطايا

****

نور الحرف

منى