غصبن عنك

غمض عينك

واقفل بقك

واكتم نفسك

لو هتموت

***

اوعاك تحزن

أو تتألم

أو يوم يطلع

منك صوت

***

عايز تاكل !

عايز تشرب !

اوعاك تطلب

منَّا القوت !

***

اربط بطنك

موّت قلبك

وادفن حلمك

جوه تابوت

***

عمرك عشت

بتحضن حلمك

شايف أملك

بكره وبعده

ضلام وسكوت

***

حتى النبضه

ف قلبك تايهه

ف شريان دايب

عايشه مشاعرك

إحساس موت

***

اقفل بقك

اقفل ..سلسل

فوق حنجرتك

مش هاتنادي

بحقك تاني
آه يا خسارتك !!

مش ها تشوف

الحلم ثواني

حتى ان كان

حلمك مشحوت

***

مش راح تفرد

جناحات حلمك

فوقها الذل

معشش فيها

كل هوان

الدنيا عليها

فوقها الظلم

يكسَّر فيها

وف إيده

خمسين نبوت!!

***********
نور الحرف
منى

أغنية حب

ضُمِّي فَرْحِي جُوَّه حُضْنِك

وبْحَنَانِكْ قَرَّبِي

غطِّي حزني بنبض قلبك

وبإيديكي طبطبي

باندهك و القاكي نسمه

هفهفت فوق تُلّ تاجي

رفرفت فوق عيني ننِّي

ماانت أصلا جوه مِنِّي

بين رموشي ف قصر عاجي

لو هااقول عنك حكاوي

هااحكي ألفين من الليالي

واسمعي الطير اللي شرَّق

واللي غرَّب..

لما تغريده يلالي

جوه منِّي .. حب صافي

صدقيني جوه منِّي

وف عيوني السحر وافي

من جمالك....

ولْجمال فجرك هاغني

  

هااكتب الغنوه اللي شافت

فوق غيطانك..زرع حبي

واكتب الغنوه اللي عاشت

بين حنايا القلب تسبي

واكتب الغنوه اللي جابت

من صدى صوتك لقلبي

واسمعيني لما اغني

واسمعي

عشقي ف هواكي

جوه لحني

فوق وتر قلبي ..وخدني

فوق سحابك

ياما قلبي عاش عشان

يفدي حفنه من ترابك

يحمي أرضك

ع الحدود أو ف الميدان

والجراح بتهون ف حبك

والجسد

واحلفي بدمي وعروقي

يوم ما تنزف تحت رجلك

يابلد

قلبي بايع ليكي عمره

قبل حتى ما يتولد

****

نور الحرف

منى