جديد

29‏/11‏/2014

الحق ضايع




كان معايا وبين إيديا...
وروحي فيه
كان حياتي ونور عينيا...
كنت باتسنِّد عليه
كان بيقْضِي لي حاجاتي
كان بيطَّمن ليلاتي...
الدوا يامه خُدِيه
كنت بافرح لما ييجي
بصوت حنيِّن
والتقيه
بين ضلوعي ف حضن دافي ..
وقلبي بيطبْطَبْ عليِه
كان مُنَاه أحلام بسيطة
وقلبه طيب
كان صحابه ف أي زنقه
يلجأوله عشان قُرَيِّب
كنت هااخطب له السنة دي
بعد مايخلص شهادته
أصله من أول ميلاده
كان بيعشق بنت خالته
جت له اعفا عشان وحيدي
مات أبوه من يوم ولادته
من ساعتها وهو ابويا
يرعى حالي ..وأنا بنته
........
لما قال لي ياامه خارج
لجل مانعدي بأحلامنا الحدود
لجل مانكسر من الإيد القيود
لجل أعيش العمر شايف
كل أولادي أسود
لجل حرية وكرامة
لجل ما تقوم بالسلامة
البلد دي بالصمود
لو  هموت يا امايه سامحي
وادعي ربي أكون شهيد
و زيّ ماتكون السما
كات فاتحه بابها
لسة ماخلصش النهار
جاني الخبر
راح زين شبابها
مُت يابني
وسبت قلبي جوه حزنه
مت يابني وانخطف....
من حضني حضنه
قُلت قدَّر ربنا....
ومكتوب عليا
انحِرم من ضيّ قلبي
ونور عينيا
قالوا: هانجيب حقهم....
كل اللي ماتوا
قلت يتحرَّم على بدني السواد
ولا أقيم عزا
قبل مااخد حق ابني والولاد
السنة عدت وراها ألف عام
والوعود دابت مع موت الكلام
كل اللي قاتلين معروفين بالإسم كام
والكل شايف ع الملأ ..وسط الزحام
وبعد عمري ما انطوى ..
حزن وجوى
على زين شبابها
النهاردة بس ياابني
مُتِّ تاني
دمك الغالي
ملا توبي وكياني
حتى الشوارع والحارات
مليانة ناس
والكل بينادي القصاص
والقاتلِين جوه السجون
ف(5)خَمَسْ نجوم ..متنعمين
وان كنت تعقل حضرتك؟
كان فيه سؤال
واقف على طرف اللسان
سؤال برئ!!
حكم البراءة اللى صدر
هيجيب ف يوم حق الشهيد؟
أنا اهو معاك وهااقول صحيح
لو اللي قاتل كان برئ
ولا يوم قتل ولا قال لهم ؟
طب هاتوا كل الناس بقى
واسالوهم ... حلفوهم
يمكن يقولوا همَّا مين
القاتلين !!!
...............
منى الغريب


16‏/11‏/2014

وكنا صغار




زمان كنا أعز اصحاب
وكان الود يجمعنا
وياما كتبنا أسامينا
مابين قلبين
على شجرة ف بستانا
وياما م الهوا نمنا
وبنشبِّك صوابعنا
وكنا صغار
بنفرح لما بتمطر
ونطنطط ..
تطرطش ميِّة المطرة...
على روسنا
وترسم دمعة ف عيوننا
ونجري تحتها نصرخ
من الفرحة
وتتلحوس فساتينا
وكان اللعب غميضة
وكانت القلوب بيضا
وكات ضفايرنا تتمايل على كتافنا
وبتهفهف شرايطنا
وكانت كل أمانينا..
ف ليلة العيد
ننام نحضن فساااتينا
بلون أحمر وورد بياض
وجزمه بيضاء والتوكة....
بلون النقشة في الفستان
وانام أحلم بيوم العيد
صلاة العيد
وايدي ف حضن إيد امي
نصلي العيد
وبارجع جري
على بابا وابوس ايده
وده خالي وده عمي
وبالقى جيوبي مليانة عيدية تمام
دي كانت كل احلامنا
.......
كبرنا.. والسنين عدت
على الأحلام وغمِّتها
وراحت نقشة الفساتين
وزهوتها
ودابت جزمتي الحمرا و توكتها
مابين فُرقتنا ألف خصام
لقينا الدنيا واخدانا
وكل اصحابنا نسيانا
لكين حلمي  بليلة عيد
فضل عايش
مابين ضلعي وبين قلبي
وفاق العقل
كبرت صحيح
وحلم العيد ف أحلامي
هايفضل.... طفل
.............
منى الغريب