جديد

29‏/12‏/2014

الهمّ راكبني


هات الريشة وتحت العين

وارسم دمعة على الخدين

خلي خطوط الوش حزينة

وملامح مليانة أنين

والهِدمة زرّقها شوية

زود فُرشة ولا اتنين

والنظرة خليها بعيدة

بُعد الفرحة لقلب حزين

.........

ده الهمّ راكبني وفوق راسي

عايش بين أهلي وبين ناسي

نسْيِت رجلي شكل مداسي

وماتعرفش أنا رايح فين ؟

اوعوا تقولوا إن أنا متسول

ولَّا بامد الإيد للغير

ولابطلب إحسان ولا صدقة

لجلٍ يجود أصحاب الخير

......................

هات الفرشة مع الألوان

قرب منِّي شوية كمان

شايف نظرة عيني لفين

بص بعيد ، طب طل هناك

حته مابتزورهاش أحزان

كل الناس عايشاها أمان

هي بلدنا ، أيوة بلدنا

هي اللي حافظها الرحمن

.............

منى الغريب

17‏/12‏/2014

أجمل عروسين


هنعلق زينة ف حتتنا
دايرن مايدور حوالين بيتنا
والملح نرشه للعروسين
يحميهم من شر الحاسدين
ويارب يتمم فرحتنا
........
كل الحتة جاية تبارك وتهنيها
دي عروسة قمر ،  رب احميها
وعريس خفه رب يهنيه
زاين الزفة ومنورة بيه
يحميهم من شر الحاسدين
والملح نرشه للعروسين
ويارب يتمم فرحتنا
........
هوّ نصيبها وهي نصيبه
م الليله خلاص مش هاتسيبه
راح تحضن وياه فرحتها
وايام هتعيشها بحلاوتها
يحميهم من شر الحاسدين
والملح نرشه للعروسين
ويارب يتمم فرحتنا
....................
ادعي له وخلي بالك منه
من اكله ولبسه ومن امه
حطيها ف عنيكي وقلبك
رضا جوزك ده من رضا ربك
هيشيلك جوه حباب العين
يحميهم من شر الحاسدين
والملح نرشه للعروسين
ويارب يتمم فرحتنا
.................
وأنت ياعريس خدت هدية
أخلاق وأدب ، متربية
تعاملها بلطف وحنيه
هتشيلك فوق الراس والعين
يحميهم من شر الحاسدين
والملح نرشه للعروسين
ويارب يتمم فرحتنا
.............
ابعد ياحسود و مالكش مكان
ده عريس وعروسة جمال وايمان
هايعيشوا حياتهم ع القرآن
والسنة تالتهم أصل الدين
يحميهم من شر الحاسدين
والملح نرشه للعروسين
ويارب يتمم فرحتنا
................
منى الغريب