دم الجراح يا وطن
زادت وفاضت فيض
حتى التراب ارتوى
من دم كل شهيد
فرحان في مين قلبك
والضحكه ملو الصوت
دا ابنك ومن صلبك
حضَنُهُ ملاك
الموت
ماهان عليك تدفنه
قلبك صبح جبروت !!؟
ندرن عليَّا ياوطن
لأمسح تراب ذُلِّي
وافتح كتاب الزمن
وارسم شعاع ضلِّي
هااكتب سطور من
نور
عن كل دم شهيد
رِخْصِت حياتهم
يوم
وباعوها يوم العيد
بادلوا رحيق عمرهم
وف لحظه بشهاده
سكنوا ف نعيم ربنا
في الجنه وزياده
******
نور الحرف
منى
أنا عشت فيك يا وطن
محرومه م الضحكة
محروم وريدي النفس
وباموت عشان تبقا
لا ف يوم عِلي صوتي
ولا قولت يوم لأ
وكياني جوه سكوت
ومعاك ماهيش
فارقه
ومحوَّطة شوفي
متْلجِّمة حروفي
بالتوهة
والخنقه
محرومه اشوف بكره
وارسم صوَر لابني
محرومه من شمسي
تشرق مابين حضني
وتعبت من خوفي
من حبسة الآهه
غرقانه ف دموعي
والضحكة فايتاها
كان نفسي فيك ياوطن
ضمه بتحضن قلب
وشراع أمان مرفوع
من فوق سفينة حب
كان نفسي فيك ياوطن
هِدمه بتسْتُرنا
لا ف يوم تعري البدن
وتموت ضمايرنا
كان نفسي فيك ياوطن
نَبْعِين حنان وأمان
أتاريك بتوب الوهن
توبي كمان متهان
كان نفسي فيك ياوطن
ضلة وقمرايه
فرحة وليد نبِّتتْ
لزهره جوايا
أتاريك لغيري وطن
وأنا بارفع الرايه
سيبت الغيلان ف الليل
ياكلوا في لحمي ليه؟
مش جسمي ده اللي حمى
عرضك وأرضك بيه
كان حبي ليك ياوطن
غنوايه ف لساني
ودمي سال يرويك
وغطَّى أكفاني
هل بعد موتي فيك
راح اشوف وطن تاني ! ؟؟
****
نور الحرف
منى
