جديد

23‏/10‏/2014

زيّ ما انت !!





لو تمرّ سنين عليك

زي ما أنت !!

مش هاتتغير حياتك!

أو مشاعرك

مهما كان أحساسي ليك

مش كفاية سنين

عيوني م السهارى

والرموش ايام حيارى

والدموع مالية الوريد

مش بعيد

كل يوم بيفوت عليك

بتزيد قساوة

شيئ بيتبدِّل ف ذاتك

.......................

منى الغريب

01‏/10‏/2014

الآء ( بنت عمري )





يا آلاء


يوم ماشيلتك جوه منِّي
نورت بيكي الخلايا
فتَّحت زهرة شبابي
زهزهت شمسي ف سمايا
لما كفِّك نام ف كفِّي
نشْف الدمع ف بكايا
قبل منك....
كنت بتمناكِي..
من  ربِّ البرايا
كنت باتخيل ملامحك
جوه حلمي وف المرايا
كنت باتخيل ف شَعرك
ليل وبيهفهف ورايا
كنت باتصور عيونك
غمازات بتبوس خدودك
رقة دايبة.. جوه صوتك
لما يوصل لك ندايا
كنت باستنى ابتسامتك
تحضن الأحلام معايا


واتولدتي......ياضيّ عيني
فتحت كل الزهور
زقزقت كل الطيور
شق  قلب الضلمة نور
......وجيتي إنتي
حته من قلبي سكنتي
واختصرتي
كل أيامي في عمري
لسن واحد
إلعبي أمي معايا
: خلاص ياستي
 تقولي : لسة
وتستخبي
أعد من واحد لخمسة
أنتي فين ؟ فينك انتي ؟
امسكيني يا امي يالَّا
وتجري مني ..
واعمل اني مش معاكي... 
بس روحي بيكي حاسة
واسمع الضحكة تجلجل
من شفايفك بين دموعي
ضحكة تملا الكون عليا
جوه ودني ..وبين ضلوعي
باشكر المولى عليها
بين صلاتي وف خشوعي
واما باسمع اسمي منِّك
( ماما..ماما )
قلب ماما...وعمر ماما
تحضنك كل السلامة
بادعي ربي يابنت عمري
تسعدي في الدنيا ياما
تهجر الأحزان عيونك
تملا قلبك لابتسامة
يفرح العمر بشبابه
ده انتي اسمك عندي غالي
سطَّره ربي ف كتابه
 .............
منى الغريب


أبيات القصيدة





كل ما تنادي عليا
كنت بارجع لك ليلاتي
واحلم اني جوه حضنك
بين ايديكي أمنياتي
كل حبة رمل فيكي
بلتقيكي ....
شايلة أجمل ذكرياتي
كل دمعة نازلة منّي
كل بسمة ضحكها سنِّي
تنتهي فيها آهاتي
كل ليلة تنام عيوني ...
بين جفونك
باحلمك آمال حياتي
بارمي كل همومي عندك
لو تميلي /  قلبي ساندك
بين ايديا وروحي ليكي
واشتريكي
بنور عينيا ونبض حبي
واستخبِّي
بين ضلوعي ..جوه قلبي
طمني بالود روحي
نوَّري بالحب دربي
ليه قصاد قلبي معانده..
حتى عيني عليكي شاهده
كل دقة من وريدي
ليكي رايده
كل رمش من رموشي
فات وهدَّي...   ياعنيده
بطلي مرة المناهدة
والمسي بالنجم كفك
واندهي الفجر بشفايفك
طول حياتي قلبي شايفك
ضله جاية
تتولد أيام رجايا
تمسحي الدمعة ف بكايا
ترسمي الضحكة ف غنايا
ياهنايا
وانتي واخده روحي عندك
بس مش محتاجة اقول لك
انتي مهما كنتي جنبي
أو بعيدة
كل ما اكتب لك بحبك
بلقى كل حروف هواكي
تملا أبيات القصيدة
.........
منى الغريب