حَرْفِي عَلَى سَطْرِ الجَمَالِ يَطِيرُ ...للحُبِّ مَنْدُوبٌ أَنَـــــا وَسَفِيــــــرُ
جديد
28/01/2015
مين علم قلبك يعشق
كل ما بفتح شباك قلبي
لضيّ عنيك
كل مااصالح نفسي وعمري
وروحي عليك
كل ما ببعت أشواق حبي
تطوف حواليك
وأنت بعيد
واسمع كل الهمس ف ودني
وليه تعاندني
وتقفل كل مواني ضلوعك
قبل ما ترسى سفينة حبي
وتسكتني
كل حروف الخوف في ملامحك
لو هاتفكر
قلبي يسامحك !؟
بعد فراقك ليَّا سنين
أو هجري عليك
ملفوف قلبي بكل حنيني
ومش بتملّ دموعي ف عيني
طب والحلّ!؟
بعد الحب ف قلبي ما كلّ
بعد هوان قلبي المحتلّ..
بزيف أعذارك
مهما تصلي
وكانت دقات قلبي
القِبلة ... لكل مزارك
مش راح يغفر
يوم أوزارك
مش راح يفضل
دوران نبضي
ف نفس مدارك
هاارجع ألمّ ستاير جرحي
هااغزل فرحي بخيط أحزاني
من طعناتك
همسح كل حروف أشعاري
من أبياتك
تفضا قصايدك
من إحساسي
وإسأل نفسك ..
مين كان علِّم قلبك يعشق
يمكن ناسي!!!
..........
منى الغريب
15/01/2015
أول لحظة ف عمري
شافني ف أول لحظة ف عمري
كنت ساعتها أنا نونو بـ وأوأ
بص لابويا وقال له : عروستي
أول مرة انا قلبي بيعشق
من ساعة ما شافتهاعيوني
عصافير مخي طايره تزقزق
....
قال لابويا أنا مشغول بالي
جوزهالي وتبقى حلالي
حتى إن تطلب مهرها غالي
هاأدفع عمري ، وهاأدفع
مالي
وشمس حياتي معاها ها تشرق
..........
مش عايز عفش ولا عزال
بيكفِّيني إنْ قلبها مال
ولا يفرقش معاها المال
هتاخدني على قد الحال
وتحوَّط بحنانها عيالي
ومعاها الأحلام تتحقق
............
أكبر بيها وتكبر بيَّا
تبقى حياتي وفرحتي هيَّ
وتعينِّي ف أيامي الجاية
ماتكونشي مع الدنيا عليَّ
وتفهمني من قبل ما بنطق
.............
منى الغريب
11/01/2015
خلص الكلام
نايم على جنبه اليمين
وتحت راسه مخدتي
علشان اقابله في المنام
ويشوف بعينه ضحكتي
ماسك بإيده منديلين
قال ايه هيمسح
دمعتي
عشمان اصالحه بنظرتين
واسحب معاهم شكوتي
فاكر هاسامحه بكلمتين
وافتح له أبواب جنتي
وعوده كانت في الغرام
كلام وقاله لحضرتي
قاضي القلوب احتار معاه
ولا يوم حكم ف قضيتي
قلبي خلاص ملّ ف هواه
وارتحت بعده ف وحدتي
خلص الكلام وقت الخصام
نزلت ستاير قصتي
ينام على الجنب الشمال
ينام على الجنب اليمين
أنا مش هااروحله في المنام
ماهي سكِّته غير سكِّتي
.............
منى الغريب
الاشتراك في:
الرسائل (Atom)