فرحتيني

فرحتيني

ياضي عيوني

لما نجحتي واتفوقتي

كل الدنيا ماهيش سايعاني

ماانتي ذاكرتي

ياقلبي تعبتي

طول السنة ف كفاح بتعاني

.....

قلبي وكان بيطوف حواليكي

يدعي المولى

يارب احميكي

فاكهة عمري

إنتي يابنتي

وفي امتحاناتك

لما الخوف بيبان ف عنيكي

تجري ف حضني

خايفة ياماما

يضمك قلبي

بكل حناني

وأما تطبطب إيدي عليكي

تنسي الخوف

من بعد  ثواني

.....

في امتحاناتك

قلبي بيدعي

رب ييسر فهمك ليها

تقري الورقة بكل سهولة

وتحلِّيها

وأما تراجعي الورقة

تلاقي صح إجابتك كلها فيها

وأما نتيجتك ظهرت كنتي

"الأولى " يارب تخلِّيها

شكرا ليكي يا حلم حياتي

فرحة قلبي بتحلِّيها

م الحاسدين ربنا يحميها

وبكرمه يبارك خطاويها

 ...................

منى الغريب

كلموني عليك

كلموني كتير عليك

خوفوني بجد منك

قالوا عايش ع التسالي

قالوا عمر ماقلبه شاري

قالوا داري

عنه حبك

جوه قلبك في الكرار

قالوا خبيه ...

جوه دايرة لإنتظار

قالوا ما ينفعش أبدا

إن ليل يحضن نهار

إن شمس بدون دفا

وشعاعها برد جوه نار

قالوا خافي ع المشاعر

وإن مش معناها أبدا

إن نبضه بيكي شاعر

وإن عينه شايفه لهفة

شوق في قلبي بس حاير

قالوا إنه كان ضحية

حب كان مجروح وكان

وإنه كان جوه الخيانة

من حبيبه بتاع زمان

قولت من غير أي سيره

هاامسح الجرح القديم

وأمحي كل ذكرى ليه

وازرع الحب ف حياته

كل يوم حبي راويه

وابعد الخوف عن عيونه

واشرب الود بإيديه

بكره مش هاتقولوا جارح

بكره قلبه بحبي طارح

والحنان بيننا يناديه

..........

منى الغريب

فكرني كده

فكرني كده

من إمتى الليل .. بيعدِّي عليا

وأكون نايمة ... أو في الأحلام

فكرني كده

ده الصبح اللي بيسبقني ضياه

بالاقيني وياه

وعينيا الصاحية  .. ف ضل خطاه

وراه وقدام

فكرني كده

من إمتى عينيا متابعة سواك

وإن عدى عليَّا ....كتير وياك

غير خطوة قلبك مش شايفه

غير نبضة روحك مش عارفة

غير ضحكة وبتلاغي شفايفك

قلبي و شايفك

من بين شراييني المشتاقة...

لحنان حبك

من بين ضلعيني المحنيين...

حاضنين قلبك

فكرني كده

من إمتى حنان قلبك خضّر

وعنيك ف حروفي و أوراقي

من إمتى حنينك بيسهر

قمرك ف الليل بعد فراقي

أو دمع عنيك بات بيفكر

ف هوايا  ف قلبك لو باقي

من إمتى الخوف حاضن قلبك

من هجري عشان قلبك يقدر

يرتاح من حيرة أشواقي

إن جاك الهجر ف فكرك يوم

إهجر ..

قد أعذر من أنذر !!

.................
منى الغريب