وعاشر قد ما تعاشر
مسيرك يابن آدم يوم
تفارق كل أحبابك
وموتك م القدر محتوم
......
هاتعمل خير ف دنياتك
هاتتونس ف قبرك بيه
ميزان حساس لأعمالك
صراط شعره تعدِّي عليه
وإياك م الذنوب والشر
وصفِّي النية قبل القبر
وصدقني ده جاي لك يوم
وقوفه يطول ف عز الحر
.......
كتابك بين ايديك اقراه
ده عملك بالتمام جواه
هاتعمل خير تلاقي الخير
ولو كان شر راح تلقاه
ده ربك عدل مش ظالم
منانا ف رحمته ورضاه
وشربه نرتوي بيها
من الكوثر عسل محلاه
شفاعه ياربي من طه
وجنة في النعيم وياه
.............
منى الغريب
لو تحلف لي
من دلوقتي
لغاية بكرة
إن خيالك
مشغول بيا
لو هاتقيد لي
صوابعك عشره
وإن حياتك
ملك إيديا
واني بجد
ف قلبك جوه
ولا فيه لحظة
تفرط فيا
مهماهاتيجي
قصادك قوة
مش هاتخرَّج
حبك ليا
.................
بعد فراقك
مش راح اصدق
إن كلامك
ليا حقيقي
وان حنانك
نبضة قلبك
كانت ف الدنيا
دي رفيقي
وان النظرة
الواحده بعينك
كانت بتنور لي
طريقي
.........
مش راح أصدق
لو تحلف لي
إن حياتك
نار ف بعادي
وان الدقة ف
قلبك حايرة
وان دموعك
سايلة قصادي
ريح روحك
واسحب بوحك
ظلمك .. جرحك
كنت البادي
قلبي اتحرر
من إحساسك
هو ف وادي
وانت ف وادي
...............
منى الغريب
مش هااوقف قطر قلبي
لجل ماتركب سعادتك
حتى لو كان كل حبي
رصيف بيتحمل
قساوتك
جت ليالي السهد عدت
بين محطاته الأخيرة
مهما بان الفجر فيها
ضلمته كانت كبيرة
هدّت الأحزان ف قلبي
وعدت القسوة عليها
كات رموش أحلامي تايهة
بين كوابيسي الكتيرة
رهبة الهجر اللي فاقت
كل أيامي المريرة
وأنت فيها
مافي يوم القطر هدّى
أو وقف لي.. رغم إني
كل يوم بابني في رصيف
ما بين ضلوعي
واحضن الهمسة تقولها
برد روحي ألقاه ربيعي
واسرق الحلم ف عيوني
تختفي في الحال دموعي
قطر قلبي
مش هااسيبه لحد تاني
يجرحه أو يشتريه
مش هاابيعه غير لقلب
يحس بيه
قطر قلبي له حكاوي
بين محطات لإنتظار
كل لحظة يعدّي فيها
بالأمل يحيي النهار
.......
منى الغريب
