جديد

30‏/07‏/2015

بياع الشعر



مش هااكتب تاني الشعر

ولا هاامسك في الأوزان

مش هااظبط فيهم سطر

ولا اغوص ف بحور أحزان

والقافية إن زعلت مني

راح ابيع القافية كمان

افكاري خلاص هاانساها

وابعدها بعيد عن بالي

وهااسك العقل وراها

وادي المفتاح لخيالي

....

ده الشعر خلاص خلاني

ضاعت مني الابيات

ونسيت أهلي وخلاني

وواخدني مع الحكايات

إن قلت الحب ف حرفُه

تحاوطني قوام اشاعات

ده فلان بيحب فلانة

صبح وبالليل ع الشات

وان قلت الهجر ف فكره

هايقولوا أهو سابها وفات

وان قلنا ياناس ده حرام

اشاعاتكوا بقت اساءات

ماكفاية عليكوا كلام

ضاعت منكوا الحسنات

......

أنا ليه باخرج من داري

والحرف باقيده بشمعة

  احتارت  فيه أفكاري

وخلاص أنا ليه مش راجعة

لا هااكمل يوم مشواري

ولا هاابكي عليه بالدِمعة

شِعري راح يبقى مزاري

مادفنته خلاص من جُمعه

...............
منى الغريب




21‏/07‏/2015

نسمة شوق




أنا وانت
ونجمة في السما بعيدة
ونسمة شوق
ولمسة إيد وتنهيدة
يلم هوانا ف قلوبنا
بساط الحب والأشواق
ولا يسمحش بالهجران
ولا يمشي علينا فراق
وبين الهمسة والهمسة
حنين مشتاق
وبين اللمسة واللمسة
تدوب أوراق
حروف الشوق تشعللها
ويمحي الوجد ف سطورها
ونهرب مننا لينا
تسيل الدمعه ف عنينا
نعيد من تاني حكاوينا
وتسمعنا
نجوم واقفة بتحضننا
قمر تايه في افكارنا
لحد مايلتقي له بر
عشان اشواقه من شوقنا
وأنا وانت
ونجمه في السما بعيدة
تطل علينا وتسلم
بنسمة شوق وتنهيده
حنين ف القلب يتكلم
مايخلص م الهوى كلامنا
وأحلامنا تزور رمشينا وتهدِّي
وتتمايل وتتحايل
مابينا لجل ما تعدِّي
هلال يظهر ف ليل وجدي
وتطرح بينا ليلة عيد
..........
منى الغريب




12‏/07‏/2015

لقمة عيش





لقمة عيش
عشان مالناش وطن تاني
بنتحمل وبنعافر ف لقمة عيش
عشان ماننام ف أحلامنا
ومانخافش من الخفافيش
عشان خوفنا يموت فينا
ويبعد حزننا مايجييش
وحالف لجلك أتحمل
وها أكمل
ولو معاييش

ينام حلمك مابين رمشي
ومش هاامشي
ده لحم كتافي من خيرك
ده أنا طيرك
بلف سماكي وبعاود
ماليش غيرك
وأنا ونيلك
حكاية حب مرسومة
على توبك
ده أنا أحمس لأسوارك
وأنا القمر اللي محبوبك
وشايل عنك احمالك

سؤال داير في افكاري
وردي عليه
بحور الدم
ليه سايلة بدال نيلك ؟
وليه كل الولاد عاملة
مراكب حزن في سبيلك
وليه شمس الصباح هاجرت
وطفَّى الهمّ قناديلك
وليه قفل الشجن بابك
وليه مش عارفة أحبابك
سماكي بتحضن الغربان
وتستنى ظلام ليلك
غرابك ينبش الأحزان
يخَرَّجْ منها هابيلك
قابيلك فين ؟
ملطخ ايده بدمانا
ممزع منا جوانا
وبعد سنين ومش قادر
ولا عارف عددها إيه
ولا قادر يحسّ بلهفة الأوطان
وحبه ليه
ومش عارف
يقدم دمه ليه قربان
عشان يرضيه
ولا عارف
ليحفر قبر ويتاوي
الحبابيب فيه
.........
منى الغريب



11‏/07‏/2015

من الأول





تعالى نعِيد من الأول
نلمّ جراح خطاوينا
نحاول ننسى أحزاننا
نطبطب فوقها بإيدينا
ولو فوق الخدود دمعي
مايمسح دمعتي غيرك
براح صدرك لأسراري
ودارك بابه من داري
وخيري من ربوع خيرك
ونظرة بكرة ف عينينا
...............
تعالى نعيد من الأول
ونتكلم ..ونتعلم
من اللي فات
ونفتح طاقة الذكرى
ونتشارك .. ونتعارك
وآخر اليوم
نعود إخوات
تعالى نلمّ في شتاتنا
ولو فاتنا
سنين وايام
هايرجع بالأمل بكرة
ولو تسأل عن امبارح
خلاص ننساه
لإنه مات
لكين لو حد جه بينا
وحاول يوم يفرقنا
يلاقينا أسود واقفين
ف وقت الشدة والأزمات
.............
منى الغريب