جديد

30‏/05‏/2017

سلّي صيامك

صورة ذات صلة

سلّي صيامك
نضف نفسك ...من كراكيبها
صون لكلامك
إياك سيرة حد  تجيبها
......
واترك غيبة ويّا نميمة
اوعى العيبة يدوقها لسانك
هيا نصيحة جميلة عظيمة
عيش بالتقوى يزيد ايمانك
....
اقرا آيات الله واوعاها
تكسب دنيا وآخرك جنة
كل حقوق الغير ترعاها
لجل تنول اللي بتتمنى
......
سلّي صيامك مع أصحابك
تحلى عمايل الخير للناس
واخزي شيطانك لو يوم جالك
اصله شيطان وسواس خناس
.....
حب الناس لجلن ماتحبك
واقرا آيات الله ف كتابه
واحفظ سنة طه بقلبك
فعل الخير راح تلقى ثوابه
.....
ارعى حقوق الجار والجيرة
شاركه ف فرحه وف احزانه

غض الطرف وصون السيرة
ده حبيبنا وصانا عشانه
......
إسلامك مش بس الظاهر
إسلامك أخلاق وبصيرة
دينك حب وقلبك طاهر
بالبسمة مش بالتكشيرة
....
علشان ربنا وصى حبيبه
إن الجنات للطايعين
هتكون من حده ونصيبه
تبقى ثوابه يوم الدين
......
منى الغريب
 
 

26‏/05‏/2017

قلبي البريء




 
ولإني مشتاق لك
قوي ؛ فانا واقف
على جبين الزمن
لحظات
بسلسل عمري واستنى
ألمّ النبض م الطرقات
تفوت لحظة ورا لحظة
لغاية ماالتقيها
ساعـــــات
وكل مااشد في اللحظة
بتهرب من قصاد مني
وتلضم عمري
في السنوات
واعدِّي فوق ضلوع خوفي
وبـ كفوفي
اخطي السور
لا فيه أسلاك بتمنعني
ولا حراس ترجَّعني
سنين عديتها من عمري
بعيد عنك
وحسيت إني م الأموات
وامد الخطوة
تحدفني خطاوي
كتير
واغمض عيني جوايا
لإني تعبت م التفكير
صحيح مسجون
لكن روحي
عشان خاطرك
هاحررها وتخرج
برة أسوارها
مسيري  يوم
أمَلِّي عيني من صورتك
وقلبي ينطبع ألبوم
تمد صوابعك النونو
وتمسكلي صباع واحد
واحس بنبضتك فيا
بتسري في وريد واحد
تبص بعينك الرحبة
الاقي براح قصاد شوفي
وأول ضحكة تضحكها
بتقفل لي طريق خوفي
ضيا عيني... وتكويني
و أجمل حرف ف حروفي
يا بكره الجاي
واعيش ازاي
في أحلامي
وصوتك مش قصاد مِني
كعزف الناي
يا أجمل فرحة
من جواي
طلبتك م الزمن مرات
لكين طبع الزمن نساي
ولما الربّ قدّر لي
دعيته عشان
تكون ليا
سند وحبيب
تكون فجر
لظلام ليلي
تكون لي قريب
هافوتك
بس هاارجع لك
ف أحلامك
وتلقى نصايحي
ف ودانك
وقدامك ليوم الدين
وأحلامك ف أحضاني
وهسمع زقزقات عصافير
بهمسة من شفايفك
يوم
مااكون برة
حدود الظلم
والظالمين
...........
 منى الغريب

20‏/05‏/2017

خلاص هانسى





وبعد  سنين
عاشتنا عجاف
بترجع لي
تخضَّر
زرعتي ف قلبي
تقول إني
عليكي بخاف
وصدقناك
أنا وقلبي
ماكدبناش
لكن عيني تكدبني
ورمشي ليك بيجذبني
لضحكة روحك الصافية
ولمسة إيدك الدافية
لكن روحي
كانت حاسة
وقالتلي بلاش
.........
عاهدت صحيح
وفين وعدك
وقولت ازاي
أسيب الدمعة
في عنيكي
قصاد عيني
وما امسحاش
واشوف النظرة في
رموشك  تناديني
ولا اسمعهاش
واشوف الرعشة
في إيديكي
تدوّر عن حنان كفي
ولا احضنهاش
.....
وصدقتك
وجه بعد الوصال
هجرك وشق طريق
وماتت كل أحلامي
بنار الشوق
وبان جوه الضلوع
قلبك.. كإنه برئ
لا يوم طبطبت على قلبي
ولا من ضمن أحبابي
ولا ندهت عيونك يوم
ولا وقفتش على بابي
 ما حبتنيش
وانا برضو
ماحبتشي
لإنك كلمة منسية
في سطر الشعر
وموجة جرح على مية
ف بحر الهجر
وانا نسيتك
رميت قلبي
في بير الصبر
.......
منى الغريب


14‏/05‏/2017

لسَّاك كده





لسَّاك كده
تشحت
في نبض الأوردة
همسة كده ...
وضحكة كده
في القلب ...
تجمع أرصدة
نبضة حنين
تحييك يومين
تستجدى ليه
من ده .... وده
صدقني لو متأكدة
إن ف هواك
مخلص صحيح
حبك يصدّ
لأيّ ريح
وان الضلوع
والأوردة
مايشق روحها
غيري انا
.............
منى الغريب