و مش عارف هجرتِك ليه ؟

و ..سامحيني

أنا آسف

مانيش عارف

هجرتك ليه ؟

ده كنتي الفجر

ودليلي

ف سفر ليلي

نسيت الخوف

وف عيوني

بدرتي الضيّ

فين مابشوف

.....

مانيش ناكر جفا قلبي

وموت وعدي لأحلامك

ولا ناكر قساوة

وحدتي بعدك

وآلامِك

عرفت غلاوة الضحكة

عشان ما شفايفي فارقتها

وتوهت وتاهت الهمسة

لإن وداني نسيتها

عشان قلبي اللي مستني

تردي النبضة للشريان

عشان كل الدموع واقفة

على شط العيون قربان

عشان خاطر ضيا قلبك

على جبيني خطوط فرحك

وجوه القلب بملامحك

ده لو بإيديا راح أسامحك

ف سامحيني

وآسف لو جرحتك يوم

يانور عيني

....

مانيش عارف هجرتك ليه

كفاية الدنيا باعداني

وقلبي عليل وبيعاني

وكات روحك سند ليا

لقيتك برضو بايعاني

وآااااه ياحرقة الكلمة

بتوهة حرفها في الكون

وآااه يا دنيا مش سالمة

من الآهة منين مانكون

وآه من دقة بردانة

مابين قلبين ف وسط ظنون

ومن ضحكة بتتخبى

لدمعة تشوفها

جوه عيون

وآه من بكرة

جوانا

 و آه من توهة واخدانا

وآه من حلم ماكملشي

مابين رمشي

مالوش جناحين

يطير بيهم

ولا واحد

ولا بيطل على ليلي

عشان أحلامي

لون واحد

ماهيش 100لون

....

منى الغريب

مزاد علني

يالا تعالى ... و قرب شوف

للبيع ..عندنا بني آدمين

سوقنا اهو مليان ..ع المكشوف

راح تشتري.. مهما يكون مين

ألا اونا .. يالا .. ألا تريه

يالا ياهانم .. يالا يابيه

قرب ..قرب ..عندنا إيه !!

عندنا طلبك مهما يكون

وأكيد عندنا راح  تلاقيه

...

آدي "صابرة" ضحية أهاليها

أمها ماتت من سنتين

سابها ابوها من بعديها

في الشارع وسط الشياطين

عمرها بس سبع سنوات

تخدم بدل الأسرة تلاتة

ولا تحتاج يوم شغالات

اسمها صابرة بنت شحاتة

في اليوم طقة هاتكفيها

في السنة هدمة راح تكسيها

ولا هاتقولك عايزة مرتب

ولا هات لي فلوس اصرف فيها

مين هايزايد

يرفع إيده

ألا أونا يالا ألا تريه

...

ودي "راضية"  ضحية بنعرضها

أم ..وكانت فاتحة البيت

بعد وفاة الزوج والوالد

شقيت جدا على أولادها

لسة ولادها ياعيني صغار

مشوارها ليل ماله نهار

كانت تحرم روحها اللقمة

لجل توفر ليهم هدمة

العين ضعفت م الأيام

والصحة ماعادتش تمام

كل ولادها خلاص نسيوها

بعد ماكبرت قاموا رموها

يالا ياهانم يالا يابيه

مين هايزايد

يرفع إيده

ألا أونا يالا ألا تريه

...

عم "حسين" ده عجوز

وضعيف

تبكي عنيه ليل ويَّا نهار

يطلب م الناس حق رغيف

بعد ماكان يملك مليار

ولا عنده م الدنيا عيال

غير أخين بلا مال ولادار

كل ما يعطف على أولادهم

يملا قلوبهم غلّ ونار

وف يوم رفعوا قضيّه عليه

قالوا ده خرّف عيني عليه

صدْمته فيهم قتلت قلبه

اخدوا المال من بين أياديه

مين هايزايد

يرفع إيده

ألا أونا يالا ألا تريه

...

يالا تعالى ...قرب شوف

للبيع ..عندنا بني آدمين

سوقنا اهومليان ..

ع المكشوف

راح تشتري..

مهما يكون مين

ألا اونا يالا ألا تريه

يالا ياهانم.. يالا يابيه

عندنا طلبك مهما يكون

بني آدمين للبيع تلاقيه

كل ما نقسى على بعضينا

نرخص قوي ولا نسوى جنيه

......
منى الغريب