.jpg)
مش هارجع لك
حتى لو ناديتنى عمرك
مش ها ارد خلاص عليك
مش هاصدَّق
دمعة واحدة من عينيك
مش هاصدق
حلم عشته بَاغير عليك
مش هاصدق
حتى لو حلفت عمرك
إن حبى
ولَّا قلبى كان شاريك
مش هاصدق
لو حلِفت النوم ناسيك
وإنِّ طول الليل فى نجوى
ولَّا نومك بيجافيك
مش هاصدق
بعد جرحك ليا تانى
هو جرحك قلبى
مش صعبان عليك
ارحل كفاية
قلبى مش ناقص جراح
جايز فى بُعدك
يشفى منك ولا بيك
إرحل بعيد
وأكيد فى بُعدك
ينسى يوم ينده عليك
***
منى الغريب
جيتي ياامَّه بالسلامة
ياألف مرحب
عارفة طبعا
إن روحي مشتاقة لك
كنت محتاجة لوجودك جنب مني
ليه يا أمي
طالت المرَّة دي غيبتك
شفتِ حالتي...صعبة حالتي
طعم كل حاجة ياامّه ف حلقي مُر
ما ف حياتي طول غيابك شيء يسُر
زي ماتكون الليالي وف فراقك
حالفة ما الأيام..تمُر
عايشة ياامة
بس جوَّا القلب ميِّت بين ضلوعي
عايشة ياامة
روحي رايحة بين آهاتي .. و بين دموعي
آه يا أمي
كل ماتمر ف خيالي كلمة منك
أجري أدوَّر
وامسك التليفون بسرعة
ياترى فيه اتصال
جايز التليفون ينوَّر
ألف جايز
باصَّة للأرقام ساعات
100 سؤال بيني وبيني
ليه ما رنش؟
ياترى خِلِص الرصيد
واسأل ف نفسي
يمكن تكون دلوقت نايمة
بلاش أرن
....
ياه يا أمي
كلميني..وحشني صوتك
يالا نحكي
واشتكي لِك من همومي
وانتي ياامه زي عادتك
بتواسيني
فاكرة لما باكون معاكِ
الكلام يبدأ مابينا ماينتهيش
كان كفاية عليا اسكت
واسمعك..علشان أعيش
كل كلمة من شفايفك
زي حقنة في الوريد تشفي ف جروحي
كل كلمة يامَّة منك
يوم جديد ... نبضة ف روحي
...
عارفة ياامّة
رغم سنِّي وطول حياتي
لسَّه روحي محتاجة لك
لسَّه محتاجة لدعاكِ
يملا كل الكون رضاكِ
بدعوة منِّك
..
عارفة ياامَّة
كل كلمة قولتيهالي ماشية بيها
والنصيحة اسمعها منك تنصحيها
باقولها لولادي وولادهم
يمشوا بيها
لاجل احسِّك جنب منِّي
لاجل اشوفك جوَّا فيها
...
آاااه يا أمِّي
لمَّا ينزف جرح بُعدك جوّا منِّي
لما طاقة النور بتقفل غصب عني
واتحرم من حضن قلبك
تنسحب روحي بقساوة ده لأنِّي
محتاجة لك
ساكتة ليه...واحشني صوتك
..
آآه يا امي
كل احساس جوَّا مني وراكِ مات
كل كلمة كات بتصرخ
كان صراخها من سكات
كل دقة بنبض قلبي
بقت عليكِ يا أمي أصعب
زي سحبة روح بقسوة
آه يا أمي وألف آاااااه
ماعادش جوّا القلب قوَّة
ولَّا رغبة في الحياة
......
منى الغريب
