مش هااموت

مش هااموت

لو ألف صوت ..

اتجمَّعوا ف قلب السكوت

لوالقمر غاب م السما 

سافر لأبعد كون

لو العيون صاحية.... مابتنامشي

أو الكلام مخنوق

لو السكون ف قلب الليل

ما يعرفشي

طعم الهدوء 

لو القلوب تنده

تصحِّي الشوق

مش هااموت

لو كتير م الناس

لاموني

وعن قلبي 

بَعدوني وسجنوني

و ألف قيد

في الإيد

 والصراخ  ممنوع

ده

القلب بين الضلوع

عايش مابيموتشي

وان يوم ضلام الخوف

عشِّش على وشي

وداق رمشي

أحزان كل الدموع

لابد من ضلمتي

 راح يتولد فجري

ومن سبات وحدتي

هاتهلّ يا بدري

وابدأ معاك صومي

ماهو أصل صومي جديد

والقلب  صبره طال

وأكيد هاييجي العيد

 نفرح معاه ف الحال

 ****
نور الحرف

منى

باتكلم بجــــــــــــــد....

كل مااشوفك.. قلبي

 يدق يدق بجد

كل ماعيني ...تقابل عينك

تطرح ورد

كل ماايدي... بتلمس ايدك

تحلف وعد

وييجي الرد

إني .....باحبِّك

تُمْلُكي قلبي

واملُك قلبك

وان الروح بتهون علشانك

مهما هاتبعد سما أحلامنا

مهما يغيب قُدَّامنا كلامنا

نرجع تاني

نغزل تُوب الحب أماني

يرجع كَفَّك

برضو يطبطب

فوق أحزاني

يرجع حِلمَك

ياخد حلمي مابين دراعاته

ينسى أهاته

أه من قلبك

لمَّا بيحضن شوقي ويفرح

لما بتخرج بسمة وشِّي

ويبات رِمْشي .....مابين أجفانَك

كنت باشوفك بين أحلامي

هَنَا أيامي

قلت هاأغمض عِيني

وأفكر واسأل نفسي

ممكن تقدر .... تنسى غرامي ؟

رد الحلم الصاحي بقلبي

:هوه  قصادي

إيده ف إيدي

مهما هايحصل

نبضَك جوه ف قلب وريدي

يا هَنَا أيامي

ونور أحلامي

ياللي باشُوفك هنا قُدَّامِي

مهما أغمض عيني وأفتح

شايف قلبك مرج غرامي

*****************

 نور الحرف

منى

مابين اللحظة واللحظة

مابين اللحظه واللحظه

بشوقي إليك

تمر عليَّا مِيت لحظه

 بافكر فيك

مابين شوقي وأفكاري

حنين ف القلب متداري

وباهرب في الخيال منه

وافتَّح عيني بالقاني

مابين قلبي وبين قلبك

كلام متقال

وما بيني وبين عينك

وبين اللحظه والتانيه

بيتغير مابيننا الحال

واشوفك في الرموش ضحكه

وجوه القلب مِيت موال

وهي اللحظة متعاده

مابيننا الحب بزياده

مابين اللحظه والتانيه

قلوب بتدوب

ولو بتقاسي ميت مره

ما مره تتوب

ولو تسهر معايا الليل

ولو تتغنى بالمواويل

ومهما السهد يوجعها

حنين الشوق يرجعها

ومهما الهجر يبعدها

بكلمه حب قلبي يميل

وبين اللحظه واللحظه

هااعيش وياك

ف حب جميل

-------

نور الحرف

منى