سلّي صيامك

سلّي صيامك

نضف نفسك من كراكيبها

صون لكلامك

إياك سيرة حد تجيبها

......

واترك غيبة ويّا نميمة

اوعى العيبة يدوقها لسانك

هيا نصيحة جميلة عظيمة

عيش بالتقوى يزيد ايمانك

....

اقرا آيات الله واوعاها

تكسب دنيا وآخرك جنة

كل حقوق الغير ترعاها

لجل تنول كل ماتتمنى

......

سلّي صيامك مع أصحابك

تحلى عمايل الخير للناس

واخزي شيطانك لو يوم جالك

اصله شيطان وسواس خناس

.....

منى الغريب

دنيا الأحلام

هانغمض عين ونفتحها

نرسم دنيا ونعيش فيها

.

ونكمل بالشوق ملامحها

والحب يضلل حواليها

.

لا عزول ولا حاسد يعرفها

ولا يوم أحزان هاتخطيها

.

والقسوة دي ماتت على بابها

والهجر مايعرف يلاقيها

.

وان قولنا نداري ف مشاعرنا

تنطق عينا وتبوح بيها

.

وان حَضَن الليل يوم أحلامنا

نلاقيها تكمل بعضيها

.

وسكوتنا بيحتار ف كلامنا

وايدينا بتحضن أمانيها

.

دا الكلمة ان تنطقها شفايفي

ألاقيك بتكمل معانيها

.

دنيا الأحلام لو نرسمها

بالحب مابيننا هانبنيها

............

منى الغريب

توب الحكاوي

وبتلبسي توب الحكاوي

وتضحكيِ بالشفتين

تاخديني بين حضن الأمل

وتشعبطي بيا السنين

فاكراني مين !؟

ده انا يادوب حرفين وجع

نبضِةِ حزين

هَمِّي المبعتر فوق ليالي قسمتي

وباخبي منه كل دمعة م العينين

تغلبني دايما دمعتي

ومزلزلة مني الحروف التعبانين

وخداني ليه .....

في الدوامات

ومخلخلة مني السطور

كل النقط جوه ....

ف متاهات الوجع

بتوقف الآهة ف حلق الذكريات

طب ليه نموت

من كَسْرِة النفس اللي فاضت

في الضلوع

من حزن قلبي يوم ماينسى

فرحته

أو يوم يضيع منه الرجوع

من كل نبضة روح

بتنساها الحياة

من ألف صرخة

من حنايا الأوردة

بتقول لي :

 آآآآآآآآآآآآآآآآه

..................

 منى الغريب

أنا ندمااااان

أنا ندمان من امبارح

بأقولها لك....

ومش مكسوف

عشان فكري اللي كان سارح

ماشافشي طيفك الملهوف

دا أنا فكري عليك مشغول

يلف الدنيا عرض وطول

عشان ألقاه ف أفكاري

وباسرح لجل مايداري

عيونه بدمعتين شاهدين

واشوفه بضحكة مسموعة

تنور دنيتي وتشوف

....

أنا ندمان عشان قلبي

طمع له ف دقتين تانيين

يقوم طيفك عليه يقسى

يزود شوقه شوق وحنين

ودقاته تنادي عليك

عشان ياحبيبي مش معقول

ابات أسهر وليلي يطول

وأحلامك بتملا عنيك

...............

منى الغريب