دقّ الجرس

دقّ الجرس

واتجمعت كل العيون النعسانين

صف الطابور

ظبط شمال

حازي اليمين

إرفع إيديك حيي العلم

ردت حيطان المدرسة

بتقول آمين

زلزل صداها ع الجيران

كل الشبابيك صقفت

بصت عيونهم

ع الطابور

والحوش خلية م البشر

صفين بنات ..صفين بنين

أستاذنا "خاطر" وقتها

في إيديه عصايته وكلنا

تعظيم سلام

ويا سلام

لو بس واحد مننا

يعصى الكلام

تبقى نصيبه وقسمته

وايديه تدوق الطرقعة

واللسوعة

أو يتفصل له كمان يومين

خلص الطابور

فوق السلالم دبت الرجل

القوية في انتظام

سربين الحمام

والأبلة " مرفت "

تبتدي شرح العلوم

تعمل تجارب أكسجين

بصة غباوة ع الوشوش

واحنا بعنينا المحتارين

مالنا ومال الإكسجين

والنتروجين

كل الدروس

حشو ف عقول

وناقصها فهم ...

احنا يا ابلة محتاجين

نربط حزام المعرفة

فوق بطننا

يا ابلة "مرفت"

مستحيل نكبر كده

والحشو مالي مخنا

وازاي ياعقل بتتشحن

طول السنة

ويوم الامتحان

بتطلع الشحن ف دقايق

أو ساعات

كفايانا حشو وملو جوف

نخرج نقول شكرا علوم

شكرا ياعربي وفلسفة

ويا التاريخ والهندسة

عايزين نفكر كلنا

ازاي ننمي عقلنا

عايزين يكون من وسطنا

عالم / مهندس / أو طبيب

يحكوا عليه كل البشر

عايزين ثمر

مااحنا ان زرعنا زرعنا

بلا أي خوف

هايكون حصاده

للوطن

مِيت سنبلة

................
منى الغريب

ددُّو " ليب "

 لما نبِّت حرف تالت

جوه لولي بين شفايفك

واما جيتلي ..  وقولت " ددُّو "

قلبي زقطط بين ضلوعه

أصله مشتاقلك سنين

زهزهت فرحة شموعي

نطِّت الضحكة ف دموعي

تملا صمت الليل بطوله

تملا أيام السكون

إيه يكون عمري بدونك ؟

ده ابتدا في الكون معاك

لما خبطت بايديك

فوق سنين الحلم إصحِى

ددو .. ددو

قلبي من قدامي يرقص

عمري بيفتَّح بيبانه

واما تتمد الأيادي

لجل اضمك بين إيديا

همستك تبدأ بكلمه

ددُّو " ليب "

بوسة ددُّو

وف ثواني يكون موبايلي

بين ايديك

واما شوفت الصورة ليك

فرحتك بانت ف وشك

وابتدت بيك الحكاية

واما باضحك من كلامك

ألقى تكشيره ف جبينك

والقى حضن كبير لجدو

وإيد بتتسحب لجيبي

تخطف المصروف بنفسك

والتقي الفرحة في صوتك

و ف  سكوتك

اللي ما بيدوم ثواني

ضحكة وشك  تجري ورايا

ترجع بسمة وشي تزهزه

تطرح فرحة قلبي غناوي

وا ما بقولك يالا نروّح

بالقى التكشيرة في ملامحك

تجري شفايفك وتقول " نو

أعُّد ددو..

امشي يا ماما"

واما بناخدك غصبٍن عنك

بالقى دموع الشوق  ف عنيك

يرجع يفضا الكون حواليا

يمسح كل الشوف ف عنيا

واسمع همس الصدى ف وداني

ليوم ماتجيني ..المرة الجاية

ددُّو.. يا ددُّو

بوسة ..ياددُّو

.....

منى الغريب

الموت .....وانا

علِّم بقلبك ع الورق

لملم دقايق عمرنا

عِد اللي باقي

من ليالي ف حبنا

وأُقف هنا

طب هات إيديك

حوالين إيديا وضمها

إحساسي بيك

مش بس لحظه وعشتها

إحساس حياه وبيتولد

منه الحيااه

كل المشاعر بينا

محتاجه لنجاه

نادى الوجع من فوق

مآذن لانتظار

لبت قدرها الأورده

أوراق شجر والليل خريف

قال الطبيب:

م المستحيل ..

يطرح ربيع بعد الشتا

هتروح خلاص!؟؟

لسه ف دفاتر عشقنا

أحلام كتير

لسّه القصايد

بحرها محتاج مدد

لسّه الحروف

مشتاقه تحضن بعضها

لسّه الرموش غرقانه

في نهر  اللقا

لسّه الضلوع

من قسوة الفرقه

في نار

لسّه النهار

مستني ضيُّه المحتمل

ومفيش أمل

خبَّط ملاك الموت

على باب الحياه

ففتحت له

ومشيت معاه

وخلفت وعدك ليَّا انا

كات حجتك

مش كل غصن

بدون ورق

معناها مات....!

.......

منى الغريب

بلياتشو انا

 
 

ارسم ملامح حزن
فوق الشفتين
حدد خدودي كلها
فٌرشة هموم متكحلة
برموش وعين
بيّن ملامح حزنها
فضفض مشاعرك
جوه مني وقول لها
تاهت دموعنا ف سكتين
مين ردها
غير بسمتي
بلياتشو أنا
وِسع البراح كات ضحكتي
وبين الضلوع
والدمع لو يوم نسى
ودق البيبان
يلقى الشموع
فجأة انطفت
كان البراح ضيق قوي
من دمع نبضي بيرتوي
عطش الحياة
الضحكة آه
والأنّة آه
والدمعة مش مسموح تبان
نبضة وريد
صابها الجفاف
واتشققت كل العروق
واتشوقت لحظة حنان
فاضحك كمان
واضحك كمان
تضحك قلوب من ضحكتي
ع الحبل كانت سكتي
حابسة النفس
م الإندهاش
ميِّت أنا بالإبتسام
غرقان ف بحر من الألم
والكل عاش
الكل عاش
إلا أنا
...........
منى الغريب