فُتِح المزاد

يالا تعالى ...قرب شوف

للبيع ..عندنا بني آدمين

سوقنا اهو مليان ..

ع المكشوف

راح تشتري..

 مهما يكون مين

ألا اونا يالا ألا تريه

يالا ياهانم.. يالا يابيه

قرب ..قرب ..عندنا إيه !!

عندنا طلبك مهما يكون

بعون المولى راح تلاقيه

..............

آدي "صابرة" ضحية أهاليها

أمها ماتت من سنتين

سابها ابوها من بعديها

في الشارع وسط الشياطين

عمرها بس سبع سنوات

تخدم بدل الأسرة تلاتة

ولا تحتاج يوم شغالات

اسمها صابرة بنت شحاتة

في اليوم طقة هاتكفيها

في السنة هدمة راح تكسيها

ولا هاتقولك عايزة مرتب

ولا هات لي فلوس اصرف فيها

مين هايزايد

يرفع إيده

ألا أونا يالا ألا تريه

بيعت صابرة بـ عشرة  جنية

....

ودي "راضية"  ضحية بنعرضها

أم ..وكانت فاتحة البيت

بعد وفاة الزوج والوالد

شقيت جدا على أولادها

لسة ولادها ياعيني صغار

مشوارها ليل ماله نهار

كانت تحرم روحها اللقمة

لجل توفر ليهم هدمة

العين ضعفت م الأيام

والصحة ماعادتش تمام

كل ولادها خلاص نسيوها

بعد ماكبرت ليه هملوها

يالا ياهانم يالا يابيه

مين هايزايد

يرفع إيده

بيعت راضية بـ خمسة جنيه

.......

عم "حسين" ده عجوز

وضعيف

تبكي عنيه ليل ويَّا نهار

يطلب م الناس حق رغيف

بعد ماكان يملك مليار

ولا عنده م الدنيا عيال

غير أخين بلا مال ولادار

كل ما يعطف على أولادهم

يملا قلوبهم غلّ ونار

وف يوم رفعوا قضيّه عليه

قالوا ده خرّف عيني عليه

صدْمته فيهم قتلت قلبه

اخدوا المال من بين أياديه

مين هايزايد

يرفع إيده

عم حسين جاب خمسة جنيه

.....

يالا تعالى ...قرب شوف

للبيع ..عندنا بني آدمين

سوقنا اهومليان ..

ع المكشوف

راح تشتري..

 مهما يكون مين

ألا اونا يالا ألا تريه

يالا ياهانم.. يالا يابيه

عندنا طلبك مهما يكون

بني آدمين للبيع تلاقيه

كل ما نقسى على بعضينا

نرخص قوي ولا نسوى جنيه

...............

منى الغريب

ستائر الخوف

الخوفُ أرخَى بالقلوبِ حَبائلَهْ

طَابَت لنَا هَذِي الحبال الهائَلَةْ

كُلُّ الصياحِ اليومَ قد أضْحَى سُدَىً

نَامُوا... فمَا عَادَ السُبَاتُ بمُشْكِلَةْ

حتَّى النُجُومِ إذَا بَدَتْ بِضِيَائِهَا

سَادَ الظَّلامُ عَلَى الوُجُودِ فَكَبَّلَهْ

أَيْنَ المَصَابِيحُ المُنِيَرَةُ فِي الوَرَىَ

أَيْنَ البُيُوتُ العَامِرَاتُ بِبَسْمَلَةْ

مَاعَادَتْ الدُّنْيَا تَهَابُ سَمَاءَنَا

قَنَصَ الذِّئَابُ مِنَ القَطِيعِ المُهْمَلَةْ

مَنْ قَدْ أَنَاخَ الجَهْلَ كِيمَا نَمْتَطِي

مَنْ ذَا بِشَرْعٍ لِلْوَغَى قَدْ حَلَّلَهْ

مَنْ ذَا بِرِقٍ لِلْعُقُولِ يُجِيبُهُ

بِالضَّعْفِ قَدْ جَاءَ الهَوَانُ لِيَقْتُلَهْ

هَذَا رَسُولُ اللهِ أَكْرَمُ مُرْسَلٍ

وَبِخَيرِ دِينِ اللهِ جَاءَ لِيَحْمِلَهْ

حَمَلَ الأَمَانَةَ ..لَمْ يَكِلَّ بِحِمْلِهَا

وَعَلَى جَمِيعِ الخَلْقِ رَبٌ فَضَّلَهْ

وَعَلَى سَفِينِ الْحَقِّ أَبْحَرْنَا بِهَا

عَبْرَ البِحَارِ العَاتِيَاتِ لِنُوصِلَهْ

كُنَّا مُلُوكَ الأرْضِ بَلْ كُنَّا كَمَا

قَالُوا بِتَارِيخِي : جُنُودٌ بَاسِلَةْ

فَلِمَ الخُنُوعُ إِلَى الدَّنِيــَّةِ أَخْبِرُواْ

وَلِمَ الهَوَانُ إِلَى الهَوَانِ بِمَسْأَلَةْ

لا تَفْرَحُواْ بِالكَفِّ قَدْ مُدَّتْ لَنَا

هَذِي الكُفُوفُ بِشَرِّ نَفْسٍ مُرْسَلَةْ

سُحْقًا لِكَفٍّ وَالدِّمَاءُ خِضَابُهَا

وَالدَّمُّ يَقْطُرُ بِالوَرِيدِ لِيُوحِلَهْ

أَحْيُواْ الجِهَادَ أَيَا جُنُودَ مُحَمَّدٍ

تَحْتَ السُّيُوفِ الضَارِبَاتِ نُؤَصِّلَهْ

وَنُحَرِّرَ الأَقْصَى السَّلِيبَ بِنُصْرَةٍ

وَبِنَارِ ثَأْرٍ لِلشَّهِيدِ  لِنُشْعِلَهْ

فَنَعُودُ أَسْيَادَ البَرِيَّةِ كُلَّهَا

فَخْرًا لِدِينِ مُحَمَّدٍ ..لن نَخْذُلَهْ ..... منى الغريب

ضحكة طايرة للسما

 ياااااااااه

يابو ضحكة طايرة للنجوم..

من حسنها

يابو قلب أطيب..

من قلوب مليون بشر

ياكبير بعقلك ويَّا حكمة ومنتهى..

الحب والحنية وبعيد النظر

والكل بيشورك ، ينفذ كلمتك

واقف معاهم مهما تتعب حضرتك

ولا تنتظر رد الجميل

صدرك حقيقي براح..

لكل المهمومين

رأيك تقوله  بحكمتك..

ومعاه دليل

ولا عمر باب بيتنا اتقفل..

ليل أو نهار

واقف مع كل الجيران..

لو فيه ظروف

تفرح قوي..

لو جه وخبط يوم ضيوف

ف دقيقة يتمد الطعام

إن كان عشا أو كان فطار

قلبك كبير..

قادر يساعنا كلنا

والهم شايله..

فوق كتافك عننا

نشْفت دموع كل الجيران

و شارعنا لسة ماارتواش

واتعجبت كل الحيطان

الجمعة جات

مافرشت بإيديك الحصير

نادى الإمام

والصوت وصل كل البيوت

صلُّوا عليه..واترحموا

وادعو لابو القلب الكبير

أما أنا

من روحي حته اتسحبت

سابت لحلقي ألف آه

بعدك حياتي اتلخبطت

وقْفتْ قصاد كل اتجاه

بعدك ولا ضهري اتسند

ولاشافشي عمري طوق نجاة

ومفيش خلاص

غير خبطة الباب الحزين

اللي اتحرم من دخلتك

أصبح أسير

صوتك وبس في الودان

بين حسرتي

والصدر قايد جوه نار

والدمع غرق مهجتي

مش لاقيه رجلي خطوتي

ف عز النهار

داس الزمان..

فوق كل فرحي وموته

مابقاش خلاص

غير بس حزن ف سكته

................

منى الغريب

فاتت شهور

وحشتني ....

وفاتت شهور

يابو قلب أطيب م الطيابة ..

ماشوفتنيش

ولا جيت في حلم وزورتني

ولا يوم تطلّ بضحكتك

تحضن مشاعر قلبي ..

واضحك لك قوام

فاتت شهور

والدمعة مش حِمل الفراق

جوَّه العيون متسمَّرة

حالفة ماتهدا أو تنام

....

فاتت شهور

وانا حاسة ضهري بينحني

ومفيش سند أسند عليه

والشوف خلاص سد البراح

والضيقة وقفت بين عينيه

جوه الضلوع ..
القلب متفتت ألم

والنبض مش لاقي الوريد

يدَّارى فيه

والضحكة تاهت في الطريق

والدمعه شوك..

هانفوت عليه

....

فاتت شهور

ولا يوم وحشتك تيجي ..

وتطل ف منام

والمس إيديك ...

وأجري أحضنك

واحط راسي فوق كتافك

لجل انام

طيب سامحني لو في يوم

نامت عينيا ف دمعتي

والحلق مخنوق جوه مني

وصرخته واصله السما

أو جيت  في يوم ..

تاهت حروفي وكلمتي

هجرت سطور كل الفرح

حتى القلم لابس سواد

حالف مايكتب ..
حرف في الحب..إنما

كل الحروف يكتبها ..

في القلب الجريح

كل الحروف ...
لسَّاها في صيوان العزا

كل الشفايف مصمصت

والحزن شادد في الدموع

بندعي رب يصبرك

والقلب يرجع للضلوع

....

فاتت شهور

كل المشاعر جوه مني ..
اتحجرت

محتاجة لين لمسة إيديك

محتاجة منك طبطبة

بحلف بربي ...وحشتني

وهاموت عليك

والكلام الحلو جوه مني

خلاص سكووووووت

ده لإن  موتك

خلى كل حروفي موت

.....

منى الغريب

شاف القمر

شاف القمر
حبِّة نجوم
متبعترين
فوق في السما
مستنظرين
سكت السكات
بدأ المخاض
والطلق زاد..
رغم السواد
والشمس مشتاقة لخروج
أول وليد
شد الصباح..
أول شعاع
صبَّح على الفجر الجديد
والكون نطق
باسم الإله
......
منى