أنا والبخت
عايشينها سنين عداوات
لا عمره
زارني واستنَّى
ولا ف
وجوده باتهنَّى
ويوم ما
وعدني بالحنة
لقيت فرحي
ف قلبي مات !
.....
أنا والبخت
أيامنا كقط وفار
زرعت الفرحة في قلبي
لقيت الحزن بالقنطار
فتحت له بيبان روحي
عشان يفرد جناحاته
يفوت قلبي ودقاته
لقيت الفرح منه طار
....
أنا والبخت
من يومنا حبايب روح
إيديه في ايديا
ويايا منين مابروح
وحلِّفته بعشرتنا
يفارق مرة دنيتنا
فـ هز كتافه واتمطع
وقال ازاي انا اطلع
ومش فايت مكاني جروح
...
انا والبخت
مش سايب لعيني النوم
وصبح وليلي باتحايل
والفّ وادور واتمايل
واطبطب فوق كتاف حلمي
وابوس يده
عشان ليلة انام فيها
واصحى الصبح واحكيها
اتاري السهد ماليها
يعدَّى الليل وانا مهموم
...
انا والبخت...
ودموعنا سيول ع الخد
بنهرب منها تلقانا
ونبعد عنها جوانا
طريق مابينا سد ف سد
حاولنا كتير نداوي العين
ونزرع فرح ع الخدين
ونقطف م الوداد حبة
يحس القلب بمحبة
يفتّح في الضلوع بالورد
ويحضنا الربيع بالود
اتاري البخت مش عاجبه
و فاتنا للشتا والرعد
.....
منى الغريب
