يا مرحبا

قلبي اللي شافك من بعيد

ف جريت عليك

أهلا حبيبي.. وحشتني

وببسمة حلوة حضنتني

ومسكت فيك

تعالى عندي يا مرحبا

عارفاك أنا ..عشاك خفيف

فنجان لبن والفينو حاف

واحلف عليك من فرحتي

والله ما تمشي إلا ان تبات

عندي المكان واسع فسيح

أوضتك هناك

بعيدة عن صوت الولاد

ولا أي شيء راح يزعجك

بعد العشا ، إنت وانا

والسهرة تجمعنا في كلام

كلام كتير ..

القلب يحكي

وانت رُدّ بحكمتك

لسَّاية ماشية خطوة خطوة

ف سكتك

ولساية بتعلم كمان

وفاكرة كل مناقشتك

امشى ف طريق الخير

تلاقي الخير بيملا دنيتك

وف آخرتك

أحسن جزاء من ربنا

ده اللي بياخد .. من حرام

حسابه فوق على ربنا

واللي بيظلم في القلوب

بكره الميزان راح يتنصب

وحسابه برضو لربنا

بذور نصايحك

جوه منِّي مخضرة

باسمع لها..

واسقي كلامك

جوه مني محبتك

تكبر قوي

وتطرح محبة للبشر

وتبص لي

وتبص في الساعة القديمة

اللي ف ايديك

قلقت ليه

لسه  الكلام بينا يادوبك

مبتدي

لسه الحكاوي مانتهوش

ومابين ضلوعك حضن ليا

ماخدتهوش

عايز تسيبني

وليلنا لسه ف أوله

مش قولت هاتبات عندنا

قلقتني ..!

طب ليه كده

طول عشرتك

سنين وعدت ..

زي حلم ف دنيتي

عمرك رجعت ف كلمتك

لو حتى مرة وقولتها

ووعدت عيل م العيال

بتبرَّها

طب ليه بتخلف وعدي انا

بعد  اما كانت كلمتك

راح تحيي جوايا الأمل

طب والعمل ؟

وانا قلبي مشتاق لك كتير

قام بص لي بنظرة عينيه

ومسك ف كتفي وهزني

هقول كلامي وافهمي

انا جوه منك في الضلوع

ومحبتي جوه الوريد

تسري في حنايا مهجتك

مش معنى اني مش هنا

يبقى خلاص ماليش وجود

انا جوه منك صدقي

واطَّمني

صوته الحنين ضمني

طبطب عليا برقته

ومد إيده بالسلام

فصحيت انا

.......

     

منى الغريب

توب المواجع

وقت الغروب

وشعاع الشمس

أما يسلم  قبل ما تمشي..

على عرق الناس الشقيانة

المحشورة ف زحمة أوتوبيس

وعيون..

الجفن يداري ف أوجاعهم

على خلق  نفسْها قولة آه

ومحطة عمر  اهي مش لاقياه

وانا راجع لحيطان البيت مهدود

مش متحمل حتى هدومي

وباعدّ خطاوي همومي

فاضل كام خطوة لحد الباب

ومخبِّي جوه ضلوعي الدمع

راسم فوق تقاطيعي

الضحكة ضباب

خايف لتبان

فاطلع كداب

وانا ماشي جنب رصيف الفقر

اللي مضيع عمره ...

في رهان خسران

علشان

فاكر نفسه رصيف كورنيش

بيجمع كل الاحباب

ولقيته متبِّت ..

على كل انصاص الطوب

الباقية ف طرف دراعه

لجل يكمل عمره الباقي

بدون أحزان

ويعافر لجل الزمن القاسي

مايفكرش ويعلن حجره عليه

ويغير كل بلاطه بالسيراميك

وعاديك

وساعتها مش هيوافق

إنه تخطي عليه رِجل الشقيان

ولقيتني باتكعبل من فوقه

عيل نايم جنبه كتابه

وكام علبة مناديل

فوق فرشة جِرِيد

وسنينه اللي ماعديتش الستة

راسمه فوق وشه كل التجاعيد

واتعجبت .. وقولت ف نفسي

ليه ماصحيش

لما وقعت ف لحظة عليه

أتاريه كان جوه الحلم هناك متمطع

فارد جناحات الأمل الجاي

طاير ويَّا سنين بتمُرّ خلاص

مرت لحظات ف سنين العمر

وشقاه في الآخر خلاه

بيكمل كل انصاص الطوب الناقص

لرصيف غلبان

فلقاه نط من الفرحة قوام

يسبق صبحه شعاع الشمس

و بسرعة

قبل ماييجي الناس

راح مادد خده مداس

.....

منى الغريب