وبتلوي إيدين الحرف
معاك
لجل مايفْتنش
على خداعك
وتغمِّي عيون السطر
وتشكي تقول
كم واحد حبيته
وأخلصت .... وباعك
..
مش قلبك ده
ياما سامحته
وعملته مابين ضلعيني
مزار
قام لفّ ودار
حوالين قلبي
وبيجرح فيه
كل اما اداويه
بتزيد الجرح
وتتشفَّى....
وتعاند فيه
....
مش قلبك ده
ياما طاوعته
وسهرت الليل
وبطوله اناجيه
واتاريه
بالنبضة الخاينة
الخداعة
أعذار مرصوصة
ف شماعة
واقول لك ايه ؟!
قادر ربنا منك
يشفيه
..
تتلوى...
مابين أوهامك يوم
وتدوق
المرّ...
كاسات
وتدوم
ولغاية
ما تطهَّر قلبك
من كل
خداع
وتزمزم
روحك...
وجوارحك
وبحب نضيف
مالهوش في الزيف
ولا فوقه قناع
تنسى انك
كنت ف
يوم
خدَّاع
....
منى الغريب
مش كنت
قولت
إنك نويت
لميت
خلاص
الكلمتين
من فوق
سطور
كل
الكتاب
لميت
معاهم
ضحكتين
واقفين
على كل الوشوش
وش السما
واقف
حزين
صعبان
عليه
إحساس
وجع
بيلفِّنا..ويضُمِّنا
من بعد
ما كنت لنا
الأب
الحنون
أفضل
صديق
بتضمِّنا
تحضن
حروف
كل البشر
جوّا
ابتسامة
ماهي دي
العلامة
اللي
تقول انك صديق
أفضل
رفيق
..
وبقولك ايه؟
المرة دي
طال الغياب
وكنت زمان
صحيح بتغيب
عشان تعبك
لكنك كنت تتحامل
وتيجي لجل مانشوفك
وبتشوفنا
وكان تليفوني
بينور
عشان جاني اتصال منك
وتطَّمن على حالي
وأحوالي
وصحة جوزي وعيالي
ودلوقتي
بقى تليفوني
م الأيتام
بقاله كتير
ولا جاني اتصال منك
ولا بترد
......
سلام الله عليك ياللي...
فارقت الجمع
عنينا م البكا نشفت
ولا عاد فيها...
ريحة الدمع
تهلّ علينا في الندوه...
يهلّ النور
تطبطب إيدك الحانية
على كتافنا...
بكل سرور
وتسأل عننا دايما
وتطَّمن على حالنا...
وأحوالنا معانا إيه
ولو تعرف فلان غايب
تقول: تليفونه ياجماعة
هنطمن بسرعة عليه
طريق ندوتنا...
بيزينه خطاك دايما
ونسعد لما بتجيلنا...
ويحلوّ الكلام دايما
ورأيك بيه تعلمنا
ورغم انك بعيد عنا
ولكنك
بحُبّ النادي واصحابه
تقول انك...
مابين الأهل والعزوه
وقاعد في صالون دارك
وبنتابعك...على الصفحة
وكنا نحب نقرالك
ونسعد بيك هِنا لما
بنسمع كل اشعارك
وتدمع عينا لو نقرا
بروعة كل أفكارك
وغيبت صحيح
فارقت الصحبة واللمة
لكن ذكراك
دي جوه قلوبنا مش هتغيب
عشان أخلاقك العالية
وقلبك بالمحبة رحيب
يارب الكون بندعيلك
وتقبل عبدك الطيب
وتقبل منه صلواته
ودعواته
وسجده سجدها
في حياته
يكون في الجنة ونعيمها
......
منى الغريب
