و هونت عليك

وبافرش لك صوان فرحك

تقوم تتحنى من دمي

وكل ماتعلا جوه الحلق

زغرودة

ألاقي ايديك بتزرع دمعة

بتغرَّق عيون أمي

وهونت عليك

تقطَّع كل شراييني

تهدّ ف بيتي وتجيني

تقول إحنا..ولا كنَّا

ف يوم اخوات

ولا حضن أمي جمَّعنا

ولا عاد بيتنا بيساعنا

حفرنا بينا ليه مسافات

تمد إيديك وباقطعها

وأمد إيديا تقطعها

زرعناها بذور عداوات

وقفنا ليه لبعضينا

ومين المستفيد فينا

ومين راح ينهي أوجاعنا

خلاص بعنا

عروق الحب مابينا ؟!

خلاص هانت عليك روحي

تقيم فرحك على نوحي

وهونت عليك

دموع أمي وأولادي

تشوفها عنيك

خلاص قابيل رجع تاني

فرش ف القلب أحزاني

غرابه من بعيد واقف

عشان ينبش معاه قبرين

ولما نموت أنا وانت

هاياخد أرضنا الأتنين

يارييت العقل يتبصر

يشوف مين اللي بيدمر

يشوف أبليسنا جاي منين

.......

منى الغريب

حِيْنَ تَفِيْقُ الْقَصِيْدَةُ

ثَمِلَتْ حُرُوفِي حِـيـْنَ جِـئْتُـكَ مَـادِحـًا

وعَلَـى الأَنـَامِـلَ سَـارَ عـَظْـمُ بـَنـَانـِي

بَكَتِ الحُرُوفُ وَقَدْ أَقَضَّتْ مَضْجَعِي

عـَبـَقٌ مِـنَ الأَنـْوَارِ طَـافَ كـِـيـَـانـِـي

خـُلـُقٌ وَنـَبـْـتٌ مـِـنْ سـَـلِــيــْلِ نـُـبـُـوَّةٍ

نــُورٌ أَضَــاءَ الْــكَــوْنَ بـِــالـــقـُــرْآنِ

أَنَا إِنْ مـَدَحْـتـُكَ يـَا شَـفِـيـِعـِي شَـادِيـًا

ذَاقـَتْ حُـرُوفـِي نَـشْـوَةَ الْــوَلْــهـَـــانِ

وَازْدَانَ سَطْرِي حِيـْنَ ضَـمَّ شَـمَـائِلاً

صَفْـحٌ وَتـَقْـوَى مِـنْ عـُرَى الإِيـْمَـانِ

مَانـَالَ شَـخْـصٌ فـِي الـحَـيـَاةِ مَـحَـبـَّةً

أَنـْـتَ الْــيـَـتـِـيــْمُ مـُـتــَـمِّـــمُ الأَدْيـَــانِ

جِئْتَ الشَّرِيـْعـَةَ بـِالـتـَّوَاضُـعِ زُيـِّنـَتْ

وَبـِـفـَـخْــرِ دِيــْـنٍ جـَــآءَ لِلْإِنـْــسـَــانِ

فـِيـْكَ الْـفَـضَـائِلُ وَالـشَّـمَـائِلُ لِلْــوَرَى

وبُـعْثْـتَ نُــوْرًا مــِنْ لَــــدَنْ  حَــنَّــانِ

صَـلَّـىَ عـَلَـيـْكَ الَّلـهُ يـَابـَدْرَ الـدُّجـَـى

صَـلَّـتْ عـَلَـيـْكَ مـَـلَائِكُ الــرَحـْـمَــنِ

...........

منى الغريب

حلم من شهرين

وجيت ف الحلم

من شهرين

وخدتك بين دراعيني

تراعيني

تقول يامه ياضي العين

دي صورتك جوه ف النني

وفارده جناحها

بين رمشين

دعاكي ليا كل صباح

بحسه نبض تكويني

وبادعي يكون رضا قلبك

كمان يسري بشراييني

.........

ده قلبي م البدا راضي

وبادعي لك

ليوم الدين

تفرَّح قلبي بعيالك

وراس مالك

يارب يكون بنات وبنين

وعارفاك ع الحدود

ف الجيش

حياتكوا فدانا لجل نعيش

ويوم ما تجيني أخبارك

وأسمع م البعيد صوتك

ينادي عليا من دارك

ينط القلب م الفرحة

واقول يارب تحميكوا

تعودوا لأهلكم سالمين

....

صحيت اليوم على ضيقة

ودمعة ف قلبي مخنوقة

وأقول يارب سلمكوا

باصلي الفرض وادعي لكوا

لكين سهم القضا صابك

ف نني القلب

صرخت بكل أحزاني

وقولت يارب

تصبَّر قلبي ف فراقك

لحين ماالقاك

أنا راضية عليك

هااصبر بعون الله

وبادعي لك شهيد يابني

وف الجنة يكون مثواك

............

منى الغريب