جدِّي قال لي

افتح كراريسك ياواد

فتّح لي مخك بالقوي

واكتب كمان

ان البداية كات كده

ربك خلق آدم

وسواه من تراب

 

وخلق له حوا

لجل تؤنس وحدته

والشجرة كانت لختبار

لجل اما يفهم لختيار

هايكون مطيع لربنا

ولّا يخالف كلمته

طاع الشيطان

وبسببه فارق جنته

.....

واكتب كمان

لما كات كل الخلايق أربعة

جه لختبار ..  والاختيار

قربان مقدم  للإله

قربان عليل

قربان صحيح

واللي اتقبل هو الصحيح

قام الطمع بدد من القلب الحنان

سول له يخلص من أخوه

سالت دما أول قتيل

شاله ولف كتير عشان..

عاجز يواري جتته

والأرض داقت وارتوت

ربك بعت له م الطيور

غراب ضعيف

وقف الغراب ينقر ف اخوه

حفر الغراب وارى اللي مات

عرف ابن آدم ..

انه أجهل م الغراب

واللي هايقتل يوم اخوه

رجليه طريق

سكة ندامة

هايحط فوق كتفه الذنوب

من وقتها

ليوم القيامة

 .......

منى الغريب

النبضة الرابعة

وبرغم ان انت

النبضة الرابعة ف قلبي

بعد ابوك واعمامك

لكن بإيديك النونو

ماسك كل النبض بكفك

متحكم فيا بنظرة عين

متربع  على كل الشرايين

وبضحكة خدك يتلون

كل وريد بيلف كياني

وبشاهد فيه ألوان الطيف

بعد ما أشوف اللولي ف عينك

كل فصول السنة تتغير

مفيهاش شتا ولا أي خريف

كل السنة  ف عنيا ربيع

ياه على حضنك يابن الإيه

بينسِّيني ان انا في الأرض

بيطير بيا ...

لفين ؟ 

مااعرفش !

علشان جوه سحابة حبك

عناقيد فل.. جناين ورد

وبشوف نفسي ف أجمل جنة

لما مابين دراعاتي بضمك

رب يبارك فيك ياحبيبي

ويخليك لأبوك ولأمك

...................

منى الغريب

    

سولي

ليه كل مااغمض ف عيوني
 
بالقاني باشوفك
 
وكأنك...
 
منقوش بالمللي على النني
 
ليه ضحكة خدك بتاخدني
 
والشوق جناحين ..
 
طايرين بيا
 
ولأبعد سما بتوصلني
 
وأما ف أحضاني بتتبسم
 
قلبي ودقاته بتتقسم
 
على أجمل نظره
 
ف مدى شوفي
 
واما ينام كفك على كفي
 
بالقى اللمسة تهدهد روحي
 
بلسم يمحي كل جروحي
 
اه يا ..( سليم )
 
قلمي بيعجز يوصف شكلك
 
نظرة عينك..ولا شفايفك
 
ولا صوابع نونو ف كفك
 
نفسي احطك جوه ف قلبي
 
وابعد كل عيون حسادي
 
نفسي يارب يطول عمري
 
لجل ماشوفك شاب قصادي
 
........
 
منى الغريب

ماحبتنيش

قصـــــــيدة / ما حبتنيـــــــــــــش

عشان مابعت لي طيفك

يصحي النظرة من عيني

و كات نايمة

مابين الرمش والنني

فخدها هواك وجنني

عشان ما دعيت على عقلي

يهدِّ الفكر موازينه

والاقي

الكفة مختلة

ومحتلة بهواك

روحي

ده انا بوحي

مايوم عدا حدود حلقي

ولا خطا شفايفي يوم

وعدا العمر من ايدي

سنين مالحقتش احسبها

تكتِّف فيا من جوه

ولاراضيه تسيبني

ف لحظة و اسيبها

ضلوع محرومة من همسة

تعطَّش قلبي وياها

دقايق عمر مااحسبها

وافديها بنبضة حب

من شوقها لضي عنيك

...

ماحبتنيش

ولو كانت مشاعرك

صادقة من جواك

لكانت جات

ف غمضة عين

تمد ايديها وتسلم

وتسرح في الحنين

وتبوح

وتسكن في الضلوع

روحك مع روحي

ولا يفرق

مابينهم روح

...........

ماحبتنيش

وحبك ليا كان كلمة

تعدي فوق سما روحي

وكلمة تقول ورا كلمة

ولا حسّيِت جراحي يوم

ولا مرة داويت فيها

مخليها

عشان ماتكون دفا لقلبك

وبتخبي

حنين شوقي

وكل مااداوي في دموعي

تعاندني

وترجع تاني تتغطى

الجراح بجراح

وشوق الكلمة يتمزع

مابينهم

وقت ماتقولها

.....

ماحبتنيش

فسيبني أعيش

أنا وقلبي

بكل الجرح من جواه

حياته  ف موت

و موت ... في حياه

ماهي واحدة

ماتفرقش

ف لحظة معاه

....

منى الغريب