إلى شهداء كمين بئر العبد بشمال سيناء

 

طالعة الضحكة ...

من جوه القلب

واللهِ ماشوفت اجمل منها

رايحيين ..أرواحنا على كفوفنا

وشهاده يارب بنطلبها

وبنتمناها

و بجد يارب

حالفين لا هانهدا ولا هننام

غير لما عليكي بنطمن

وعنيكي تنام

والحلم بيفرش في جفونك

فرْح ولادك

100 سنة قدام

وعدوِّك محبوس من خوفه

وان فكَّر أو مدّ  كفوفه

نقطعها قوام

واحنا ولادك

والأرض بتعشق خطوتنا

والنيل والسما ومحبتنا

وحدودك ونخيل الوادي

وشطوطك  والبحر قصادي

وقناتك بتعدي سفاين

ومداين بتضم مداين

زارعينك وسطينا جناين

والله ماخوفنا ولا هربنا

ولا مرة تركنا لمواقعنا

والضحكة اللي بتملا وشوشنا

كات أكبر رد لأعادينا

والغل اللي بيملا قلوبهم

مايهمك أبدا من قولهم  

بالروح والدم بنفديكي

ومعاها أرواح أولادنا

واللهِ وهاترخص ليكي

وتعيش رايتك فوق في العالي

اسمك يتغنى ف موالي

وتاريخك بيطل علينا

وهنكتبه بالدم الغالي

 .....

منى الغريب

عتاب عشاق

يا صباح الخير

اسمعنى كده

طب عندي سؤال

وجاوبني عليه

وبقولك ليه ..

بتخبي النظرة اللي ف عينك

علشان بحنانها محوطاني

ولفين ما بروح

وتداري  ف دمعة انا بلمحها

تتمرجح من بين الرمشين

لجل ما ترجع تاني النني

ولا شوفهاشي..

بالوجد تبوح

وترجع تاني..

وتلم عليك كل احبابك

عيني السهرانه

ف قلب سهادها

اللي مطول قول من شهرين

فتافيت الضحك المتبعتر

جوه ضلوعي..

المليانه جروح

وضلوع مشتاقة لبسمة شوق

لجل ما نبضات القلب تروق

وتضخ لقلبك بس

حنين

وتداري ايديك المشتاقة

للمسة إيدي

أحسن مراسيلها المحتارة

بيني وبينك توصل للروح

وتمد خطاوي البعد هناك

وتعافر لجل ماتنساني

وتنسى طريقي

وف عز البعد..

الاقيها بترجع لشطوطي

وتلاقي ما بيني وبينها كلام

وتوافق على كل شروطي

مايكونش مابينا أي ملام

ننسى الهجران

ويا الأحزان

كل اللي مابينا

بس وفاق

عهود ووعود

وعتاب عشاق

......

 منى الغريب

كان عذرك ايه ؟!!!

 

قضيت معاك أيام كتيرة

من الشقا

وبنيت معاك بيتنا

اللي كان بالنسبة ليك

حضن اللقا

كات وقفتي

وياك محبة

مش وداع

كانت ايديا ليك سند..

والكتف زاد

مليان وداد

والروح سكن

سنين طويلة م المحبة دوقتها

لا بخلت يوم

في فيض مشاعري

وحوشتها

ولا قولت نبع الحب جف

ولا من جفا قلبك ف ضاع

حبي اللي كان بيشجعك

وعليت لفوق

دلوقتي بتقول ..

انه بالنسبه لي طوق

وقيود ف ايد

ونسيت مشاعري

وكل لحظة عيشتها

ف احضان هواك

عينك خلاص راحت بعيد

ونسيت ملامحي وبسمتي

لافت عليك

بالكلمتين والضحكتين

وغمزة من رمش الحياي

وبيعت كل عهود مابينا

وماشترتش

اخر كلام عندك بقى

طب روحلها

وشوف هاتلقى ..

زي حضني عندها

أو يوم هاتسهر للنجوم

 زيي لو اتأخرت يوم

ومابين صلاتها والركوع

تدعي بسلام ترجع لها

وشوف بقى

الفرق بين حبي أنا وبين حبها

بس افتكر ..

انك كده ..

هجرت قلبي برغبتك

يعني خلاص..

مفيش رجوع

حتى ان بكيت

وبعتت قربان الندم

والقلب مليان بالدموع

مفيش رجوع

القلب داوى في الجراح

والعين بكاها مش مباح

قطَّعت كل الذكريات

ونسيت ملامح خطوتك

اسمك مابين شفايفي مر

لا والأمرّ

سألت نفسي مرتين

طب ليه بقسوة جرحتني

كان عذرك ايه ؟!!!

......

منى الغريب