نهاري المستحيل

قلبي مش قادر ينام

 
دقته مش بالتمام

 
قطر جوه ضلوعي خايف
 

نبضه واصل للشفايف
 

تحكي عنه تقول حرام
 

اللي يهجر يوم حبيبه
 

ولاّ ينساه الغرام
 

قلبي ورده
 

بس فارده قلوعها فوق مركب حياتي
 

ناقشه فوقها ذكرياتي
 

عايشه فيها سنين ولكن
 

شوفت منها كتير آهات
 

بكره جايز ييجي أحلى
 

هي رحله بنشترك فيها بجروحنا
 

وبإيدينا نداوي روحنا
 

لو هايبلعنا السكات
 

مش هانندم ع اللى فات
 

جايه شمسه تدفي بَرْدُه
 

جايه نسمه تصحي وَرْدُه
 

جايه ضحكة تترسم فوق القلوب
 

جايه دقه وراها دقه
 

جوه قلب برئ يادوب
 

حلمه نام في عيون ملاك
 

ناديت على بر الأمان
 

إنسان وراضي بقسمته
 

يوم  فرحته 
 

دي دنيته
 

لمَّا تلقاه العيون بالإبتسام
 

لو ينام الحلم ف رموش الدفا
 

لونلاقي الضعف جوانا اختفى
 

نسمع اذان الفجر  من بين السكون
 

بيشق ضلمه ليل تعذب في الجفون
 

يضحك نهاري المستحيل
 

ومعاه دليل
 

ان الإراده والعزيمه
 

بألف طعم وألف لون

***********

نور الحرف

منى

حـــــــــــلم

تيجي ف.. حلمي

 أشوفَك علم 

بتقول لى باحبِّك..

أنا مِلْكِك

أنا عايش علشانِك إنتِ

داالقلب يدق يقول اسمِّك

والعين بتسبح ولو انك..

الماظه بين التسابيح

وان جات ريح..

وتحاول يوم تصرخ جنبك

تقتل فجرك

تلاقيني يانور عيني الضيّ

ينطق قلبي يقول لك جَايّ

ضلّه لشمسك

ياللِّي الشمس ضفاير حُسْنِك

وابقى الفجر لكل حواسِّك

وان تاه منك حرف ف سطر

دمِّي هايصبح / نهر لحرفك

روحي تشوفِك مليون فجر

يسقي الزهر

يحصد عطر

من همسات تنطقها شفايفك

لمس ايديكي

ولاَّ عنيكي...

بحر حنان ومالوش شطين

والرمشين..جناحين لملايكه

تحضن موجه بتجري لشطك

واما أخُطِّك على أوراقي

نور البدر يِغِيْر من رمشك

تسرح من إيدي الألوان..

تطلب وِدِّك

واما اجدلك أشواق شِعري / 

حروف لمشاعري...

هارسم بدر

وارسم فجر

هارسم كل حروف الشِعر..

حوالين قلبك

******

نور الحرف

منى

تَعْظِيْم سَلامْ

جِيتك كلمة ف قلب السطر

جيتك قَمَرَه بْتِطْرَح فَجر

جِيْتِك جُوَّه حَبَاب العِيْن

مِلْيُوْن نَظْرَه بْـتِعْشَق بَدْر

جِيْتِك شَمْسْ

جِيْتِك ضِلّ

جِيْتِك حُضْنْ فْ لِيْلِ البَرْد

جِيْتِك حُبْ

جِيْتِك قَلْبْ

واتْمَنِّيْتِك بَحْرِ لْشِعْر

جِيْتِك جُنْدِي فْ قَلْبِ مِيْدَان

يِسْهَر لِيْلُه

لَجْلِ عِنِيْكِي تْنَام فْ أَمَانْ

أَوْ فَرَّان

طُوْلِ اليُوْم قُدَّام النَّار

قَلْبِ عَمَار

لَجْلِ مَايُحْضُنْ مُوْجِك شَطْ

لَجْلِ مَاشُوْفْ مَوَّالِكْ زَهْر

جِيْتِك عِلْمْ لْكُلّ اوْلادِك

كِلْمِة صَبْرِ فْ نِنِّي الدَّرْس

جِيْتِك عُرْس

فْ لِيْل أَحْزَانِك

يَالِّلي الشَّمْسِ تْشُقّ ظَلامِك

تِفْرِد خِيْر جِنَاحَات قُدَّامِك

يَالِّلي اسْمِك

 أَحْلَى مِنْ كُلِّ الْكَلامْ

يَالِّلي حَرْفِك لَمَّا بَنْطَقْ

نُوْرُه بِيْشُقْ الْغَيَام

يَالِّلي وَصْفِكْ

أَحْلَى مِنْ كُلِّ الوُصُوْفْ

وَامَّا اشُوْفْ

 قَلْبِكْ بِيِهْمِسْ جُوَّه مِنِّي

ألْقَى عُمْرِي قَوَامْ يِطُوْفْ

لَجْلَ أصُوْنِك ....

وِلْعُيُوْنِك

رَافِعه .....أَنَا

 تَعْظِيْم سَلامْ

&&&

نور الحرف

منى

إنت ليه

إنت ليه

كل امَّا أخُط بإيدي خطِّ..

تهدُّه تاني..

تشد شطِّي من قُصادي

تقول ده عادي

عِيدي تاني... تاني عِيدي

واما عِيدي ييجي تاني..

وأقول لنفسِي اليوم ده هافرح

ألقى فرحي مش قُصَادي

تقول لي عادي

عيدي ..عيدي

****

مش هاعِيِد..

هوه خطِّي... أيوه خطِّي

وامَّا اخطِّي..

كل خطوه من جِديد

هابني خطِّي..

المرة ديَّا من حديد

وارسم الشطِّين كمان...

وآدي خطِّ لبَحر شِعْرِي..

واقول واعِيد.....

وحروف كلامي مخضَّرة...

من فوق سطوري

هوه دوري... في الحياة

بحرفي أمحي كل آه..

من كل قلب رجع صداه

بدون مايلقى قلب جنبه يحس بيه

أو نبض يوهب له الحياه

****

مهما تعمل.. مش هاتمحي...

حرف واحد من حروفي

مش هاتقدر

مهماعُومْت ف بحر خوفي

وان قلت مره قلبي مات

نبضي يتحدّى السكات

والخوف هايصبح إيد قويه..

مهما اعاني قيود ف إيدي

هاحضن وليدي

جوه مِني بصوت آذان

وانا حرفي بيصلِّي وراه

مش قلت لك من زمان

إنه راجع تاني عيدي

أيوه راجع تاني عيدي

****

منى الغريب

2011/12/1

الأراجوز

ياللا تعالى بسرعة وشوف

حاجة عجيبة ف قلبها طيبة..

تلف الدنيا و..

تيجي ف ثانية

تجيب لك أغرب شيئ هاتشوفوا

مالهاش صوت...

إيد وخيوط

بس بتدِّي حِكَم وحكاوي

أصلك ناوي... 

تعرف حالك

واللي جرالك

بس اتفرج يالا معايا

 ع الأراجوز

لو ف حكاية يقول لك غاية

وهدف منها للي يعوز

أو من غنوة سمعتها حلوة

ونرددها مع الأراجوز

لو فيه طُرْفَه ...

أو فيه حرفه

موجودة فينا..

تبقى جميله بيطرحها

لو فيه واحد غُلْبُه مراته

ولا حماته بيوضحها...

وبيشرحها

ونضحك منه كمان وعليه

أو على حالُه فقير وف حاله

لا جاه ولا مال بيبص وراه

الأراجوز طب عاوز مسرح

 لجل مايشرح

أحوال كل الناس وياه..

قولة آه راح نسمعها ونرجعها

ويرددها الكل معاه

الأراجوز مش حاجة غريبة

مننا فينا

حكاوي دفينة

ياما سمعناعليها زمان

نسخر فيها..

 من مشاكلنا ومن عمايلنا

ف أي مكان

مين هايحب يعيش أراجوز

ويبقى رموز

للي نعيش ونشوفه كمان

&&&

نور الحرف

منى