وبتلوي إيدين الحرف
معاك
لجل مايفْتنش
على خداعك
وتغمِّي عيون السطر
وتشكي تقول
كم واحد حبيته
وأخلصت .... وباعك
..
مش قلبك ده
ياما سامحته
وعملته مابين ضلعيني
مزار
قام لفّ ودار
حوالين قلبي
وبيجرح فيه
كل اما اداويه
بتزيد الجرح
وتتشفَّى....
وتعاند فيه
....
مش قلبك ده
ياما طاوعته
وسهرت الليل
وبطوله اناجيه
واتاريه
بالنبضة الخاينة
الخداعة
أعذار مرصوصة
ف شماعة
واقول لك ايه ؟!
قادر ربنا منك
يشفيه
..
تتلوى...
مابين أوهامك يوم
وتدوق المرّ...
كاسات
وتدوم
ولغاية ما تطهَّر قلبك
من كل خداع
وتزمزم روحك...
وجوارحك
وبحب نضيف
مالهوش في الزيف
ولا فوقه قناع
تنسى انك
كنت ف يوم
خدَّاع
....
منى الغريب
