ارتحتي خلاص
والقلب اطمِّن على سَكَنُه
والعين هتغمَّض للآخر..
من غير أحزان
ارتحتي خلاص
بعد اما قاسيتي سنين وسنين
خِلفة وربِّيتي بدمع العين
وايدين بتطبطب وتهنن
ومشاكل صعبة وبتجنن
واليوم بيعدِّي سنين حرمان
ومابينهم ياما زرعتي حنان
واما سنين العمر أهي عدت
و الضهر انحنى والعود ميِّل
والعقل كمان اصبح بيتوه
والعين بتدوَّر ع النظرة
وعروق بتشوِّك جوَّه الإيد
وأفكار بتلف وبتدور
زيِّ الساقية وفبها التور
نضارتي مش فاكرة مكانها
بنتي ماجاتش ...أزعل منها
مش حاسة بشيئ من حواليا
ولا طعم المية وطعم الزاد
والشوف ف عنيا راح لبعيد
وخلاص اتنكرتم ليا
مابقاش ليا في الدنيا ولاد
علشان تسيبوني وترموني
من ايد للإيد
ارتحتي خلاص
والجِتة اهي حضنت قلب الأرض
وقابلتي كريم
وترابك بيطبطب فوقك
طاير م الفرحة بقدومك
وانصرفوا الناس ويَّا ولادك
شوفتي ولادك
ماخلاص هاتغمَّض ليهم عين
والصدر اتنهد من حِملك
ماكانوش عايزين
يشيلوكي ف آخر ايامك
ماكانوش عارفين
مين فيهم هايشارك همك
مين يمسح عينك م الخوف
مين فيهم هيمدّ اللقمة
بحنان في الجوف
مين فيهم هاينفَّض قلبه
وينسى شقاكي العمر معاه
مين فيهم مش عايزك وياه
مين فيهم نار الغلّ كواه
اولاد وبنات كبَّرتيهم
وشربتي مرار الفقر كيعان
وف عز الشتا بتدفيهم
دلوقتي خلاص وماعادش أمان
ومحدش عارف مين فيهم
ابنك ده صحيح ولا القسوة
خلعت قلبه وحطت صخرة
وضلوع صوّان
ودي بنتك ولَّا من الأغراب
بتحبك من جوه الشريان
ولَّا الحب كلام وسراب
وازاي ينكروا معروفك
ومحدش قدَّر لظروفك
ولا حط ف عينه ..
حصى وتراب
ارتحتي خلاص
سايباهم والقلب بيبكي
ودموعي سيول فوق الخدين
ولساني خلاص ناسي الكلمات
سامحوني عشان سني بيكبر
والعقل متبِّت في الخيالات
سامحوني عشان صوتي بيعلى
واللي باصبَّح فيه راح ابات
آه يا ولادي امانه عليكوا
خلُّوني عايشة ف وسطيكوا
واما الروح ترجع لباريها
تاخدوا عزايا بدمع عنيكوا
.....
منى الغريب
