معرفش ازاي
ولا عمري ف مرَّه
اتخيلتك
تبادلني شعور
أو قلبك يبادلني
النبضه
وف قلب النور
رغم ان عينيا
ف ننِّي عنيك
ومحاصرة النظره
اللي بترمح...
ولأيها بنت
لا... وبتغمز لي... وبتشاور
ايه رأيك في البنت الجايه؟
ده الفكر احتار
طول لياليا
سهران بيقلِّب في الأفكار
فقوليلي بجد وجاوبيني
إزاي اصارحها بأحاسيسي
وياترى هاتبادل شوقي بشوق
ولَّا هتصدمني بتكشيرة
وخلينا اخوات
وانسى الموضوع
وكمان هانساه
وانا مش راح اجيب
للناس سيرة
...
هاتجنني
ماتبص لعيني ونظرتها
وانت قصادي
يابو قلب عجيب
ولَّا حيرتها
لما بتتلفت حواليها
وماتكونش قريب
شوف رعشتها
من لمس ايديك
و ف أي سلام
وصوابعي بترتوي
من نبضك
كام يوم قدام
فترد الروح جوَّا ضلوعي
والقلب
بيرقص ع الأنغام
مش حاسس
بحنيني وشوقي
نبضي الساري
ف قلب عروقي
هاتجنني
....
ويبص... بعينه النعسانة
والنظرة النايمة الدبلانة
ويعمل نفسه...
آل إيه مافهِمش
وانا من اهماله بجد بموت
على كده مااقدرش
أتاريني من وهمي الخايب
باتكلم مع نفسي...
وفاكره
صوتي واصل له
اتاريه بيكلم في التليفون
واحده حبيبته
وبيحكي لها شوقه وحبه
ولهفة قلبه
يرجع نفس المشهد تاني
مابيني وبينه
ساعديني عشان
تعرف إني....
لأ ... ماتكمِّلش
وحلقي بيصرخ
هاتجنني.....
هاتجنني
.....
منى الغريب
