خليك في البيت
واياك تنزل
تعمل فيها إنك عنتر
وابن ابو عرَّام
وكمامتك على طول
على وشك وماتقلعاش
وده لو حبيت
بأمانة تحافظ على نفْسك
وماتخسرهاش
ولإيدك على طول نضفها
بصابون والمية و تشطفها
أول ماتخش لباب بيتك
وهدومك جوة الغسالة
واياك تنسى
وماتغسلهاش
......
خليك في البيت
دى كورونا مابتهزرش معاك
فيروس فتَّاك وبيتحداك
فلابد ننبِّه ونحذَّر
والباقي عليك
العالم كله بيتأثر
بتشوف بعنيك
إصابات والعدوى ف كل مكان
وكورونا ما بترحم إنسان
بتهاجم وبكل شراسة
فالموضوع محتاج لكياسة
وقلوبنا
في قلوب بعضينا
والإيد في الإيد
ولا نلمسهاش
.....
خليك في البيت
واحمي ولادك
من أيها عدوى
أو إصابات
حِد ف مشاويرك
خليهم للضروريات
تلبس قفازك وكمامتك
وبلاش الزحمة مابين الناس
جوه الأسواق
أو في مواصلات
إياك .. وبلاش
.....
خليك في البيت
لجل ماتِسلَم
ولا يوم تنصاب
ولا تعْدِي مراتك واولادك
أهل و أحباب
ييجي وقت ماتلقاش مستشفى
ولا فيها سرير
ودكاترة شايفينها بتسقط
وبرغم سهرهم وتعبهم
صامدين واقفين
وقصاد إرهاب
فيروس وخطير
ربنا يحفظهم ويعينهم
بيسابقوا الوقت ونتمنى
ولا يسبقناش
......
خليك في البيت
دي كورونا مابتهزرش معاك
فيروس فتَّاك وبيتحداك
مش وحدك ..
ده بيقتل ملايين
ولا بيفرَّق بين عِرق و دين
ومع الإهمال ياخد تصريح
واياك نديله الفرصة يطيح
دي بلدنا و محتاجة إلينا
طب قولي هاتعمل إيه فينا
إعلامنا ينبِّه ويحذَّر
يتهاون غيرنا ويستهتر
ويروح أحباب من حوالينا
نندم وقتيها وندمنا
مابينفعناش
خليك في البيت
........
منى الغريب
