قلبي انكسر

 

قلبي انكسر لمَّا

روحتوا وفوتُّوني

فين راحت اللمَّة

والضحكة والبسمة

رُدُّوا وجاوبوني

..

مابقاشي غير الضلمة

والحُرقة جوَّا القلب

والدَّمعة ف عيوني

..

قلبي انكسر يابا

راح السَّند والضَّهر

دنيا بقت غابة

والرُّوح سِكنها القهر

..

كات قوِّتي مِنَّك

ولا خُفت مرة ف يوم

يوم ماابتعد عنَّك

بتشيل قصادي هموم

..

دلوقت يابا النَّاس

أقرب ماكان ليَّا

بقى قلبهم برصاص

بينشِّنوا عليَّا

..

حتى الغريب ندهوه

واتلمُّوا حواليَّا

وبينهشوا ف قلبي

ماعادش فيه إخلاص

وعرفوا إن خلاص

قلبي مالوش ديَّة

..

قاموا قطَّعوا الشرايين

واتسلُّوا بضلوعي

ياروح ملانة أنين

يكفاكي يا دموعي

..

 

آه يامرار الريق

وقهرة الأحباب

فين يابا أوفى صديق

كله طِلع كدَّاب

..

قلبي انكسر يابا

كسرة ماليها جبر

هافضل كده لمَا

يجمعني بيك القبر

.................... 

منى

يادنيا مالك ..

 

يادنيا مالك كده

واخدانا كام لفة

مابين دموع والام

وعيون ماهيش شايفة

يا دنيا مالك بقى

مالناش مكان فيكي

طول عمر طوق الشقى

على الرقاب محطوط

ملفوف ٢٠٠ لفة

ولا يوم اعيش مبسوط

ولا ضحكة تملأ العين

طول عمر قلبي حزين

درب الحبايب ضل

وصل الطريق آخره

وادي آخر اللفة

......

منى الغريب

مفيش فايدة

 

تِعبْت كتير

وقُلت كتير

وعقلي تاه

من التفكير

واخرة حيرتي

بس معاك

باقولها لك

بعلو الصوت

مفيش فايدة

...

يمرّ الليل

وانا سهران

بسهد وويل

وخوف قلقان

والاقي عينيك

ماتسهرشي

ولا فكرك

يبات مشغول

عشان الحب

مالمسشي

وتر قلبك

وانا اللي باقول

مفيش فايدة

..

مفيش فايدة

في أشواقي

أنين قلبي

وطول بُعدك

ده حُبَّك

هو ترياقي

وأعيش ازاي

انا بَعدك

وقلبي سابني

وضلوعي

بتنزف شوق

عيوني سايلة

بدموعي

وانا المسروق

سرقت النوم

مابين رمشي

سرقت القلب

والشريان

ده طيفك

في الطريق يمشي

وانا طيفي

وراه ددبان

ولا قلبك رحمني يوم

ولا عيني

تدوق النوم

وعايش دنيتي

حرمان

مفيش فايدة

...

 منى الغريب