خلاص ماشي
ودمعي ع الخدود بيسيل
لا ليل سهدي
يطفِّي جوه قلبي النار
ولا عيني مكفيها الدموع أنهار
مفارق بعد شوف عيني
الحبايب ليه
ورايح أرض مزروعة النهار غربة
وليلها مرار
وباسمع صوتك الدافي
يرن ف ودني وسط الدار
مسافر لجل لقمة عيش
هااسيب أوطاني واتغرب
عشان مايكون لي بيت وأعيش
تغيب عني ياقلب أمك
وضي العين معاك هيغيب
وتتلفح نهار قسوة وليل غربة
في أرض مافيها أي حبيب
وبعد ماعيني كت تتملى من رؤياك
وتتدفا في أحضاني
تيجيلي لما اقول إسمك
ف وقت ماينطقه لساني
خلاص ماشي
وتفضل نبضة في ضلوعي
تعيش خايفة ... إليك بتحن
ماتنشف م البكا دموعي ولا ثانية
وتحبس بيها أيامي ماتمشيشي
واحس بغربتك بتدق في الشريان
يئن وريد
يسيل الدم فوق خدي
وبيضيع الأمل مني
عشان قلبي ماطمنيش
شكالي دولابك الفاضي
من الهجران
وشنطة كلها هدومك
كويت فيها٣ قمصان
وجزمة يتيمة محرومة ..
من الورنيش
وحتة جبنة محشورة في
كسرة عيش
ولقمة فول
وابوك ساكت
وعينه م الدموع بتقول
ياأول زرعتي ف عمري
يانبته جدرها ف صدري
أنا خايف عليك لكن.....
لساني بالدعا حواليك
وقلبي ف كل صلواته
بتتمنى السلامة ليك
خلاص ماشي ومفارقنا
بحفظ المولى والدعوات
هنيجي نوصلك برضو
لحد الشط والمركب
ونستنى هناك لحظات
ونطمن عليك تركب
أتاري البحر مد قواه
وموجه العاتي كان بينا
يادوبك غيبت عن عينا
سمعنا صرختك جواه
في لحظة العقل منا تاه
ضنانا فين ؟
ورد لنا الصدى موته
ماصدقناش
سألنا عنه موج البحر والمية
رمى لنا شنطته ع الشط
صحيح قمصانه مكوية......
ومبلولة
ونص اللقمة مقسومة
ولسة نار سؤال بتقيد
ضنانا فين ؟
ماجانا رد
..........
منى
الغريب
