جديد

28‏/09‏/2014

كله منِّك !!


غربتي كات غصب عنِّي
بعد توهت نفسي منِّي
كنتِي جوه  عيوني ننِّي
كنتي أقرب ليَّا منِّي
كل ما بيهدُّوا با بني
كنت شايل لك حمولك
كنت فعلك قبل قولك
كنت نبضة دق قلبك
كنت سايبك
تمرحي مابين ضلوعي
حتى جوعي
ف يوم نسيته لجل خاطرك
ياما قلبي عاش ف ضلك
ياما قال لك
إن قلبي نبضه إنِّي
يعشقك في كل لحظة
مش ملاحظة
إن خيرك مش لكتفي
وإني باهتف لك بإسمك
لمَّا شق الخوف شفايفي
وإن نهرك جف نبعه
بعد ماكان نبع حرفي
وإن صدرك ضاق بحبي
صد إحساسي وعواطفي
ليه ياغاليه
تنطفي فيكي شموعي
ويوم رجوعي
ماالتقي حضنك سكن
ياترى عايزاني تاني
ولَّا في أحضان بعادك
هامشي ادور عن وطن
..................

منى الغريب

26‏/09‏/2014

ليه تضايق ؟


يالا صارحني
وافتح قلبك
إيه بيضايقك
قول واتكلم
وانا اشيل عنك
شيئ من همك
قول ..اتكلم
لو كان فيه 
موضوع هيضايقك
ليه تضايق
إبعد عنه ..، واهرب منه
ترجع على طول بسمة وشك
ترجع رايق
ليه تضايق ؟
والدنيادي مش مستاهلة
نحزن فيها
دي اللحظة اللي تمر علينا
 بخير وسعادة
مدّ ايديك واتمسك بيها
ليه تضايق
داالقلب أهو فاتح دراعينه
مش عايزينه
يقفل بابه عن أحبابه
ويتربس بإديه كوالينه
لأ عايزيينه
يلم جراحه
ويمد الفرحه ف شرايينه
ليه تضايق
أرمي همومك ع الفتاح
هوّ يهون حمله عليك
تلقى الهم بسرعة انزاح
ويعود فرح القلب إليك
.................
منى




25‏/09‏/2014

ليه العتاب


بعد التحية والسلام
والسؤال عن صحتك
بتقول تمام
طب ليه دموعك
غرقت قلب الجواب
وليه بادوق جوه الحروف
طعم العتاب
ليه العتاب
والدمعتين جوه العيون
حتى الجفون
تعبت سهر
والرمش داب
وان القمر ف بعادي غاب
وصاحبت ليه كل العذاب
ليه العتاب
ده انا قلبي من احساسي تاب
نبض الوريد أصبح سراب
وحتى دمع العين ف بعدك
خد قرار الإنسحاب
ليه العتاب
ماانت اللي فارق جنتي
ودنيتي
بإديك هجرت محبتي
وقفلت بعدك ألف باب
................
منى