خبطة كفَّك على باب عمري
عدِّت كل خطاوي سنيني
صحِّت كل الشوق النايم
بين دراعيني
بكل براءة
آه يا سليم
لما تقرَّب خطوة بخطوة
تاتا ..تاتا
وكإنك ع الرمل بتمشي
وبتتسند
على خطوات رجلك
ماتخافشي
واما بشوفك جاي عليَّا
أحلى أمير والتاج فوق راسك
ساكن بغلاوتك فوق عرشي
خطوة ياقلبي لأحضان تيته
يا حبيب تيته
وبضمَّك من بين أحلامي
وف حضنك
فرحة أيامي
قبل مااشوفك
كل سنيني ماعاشتنيش
فرحة عيني ماشافتنيش
ضحكة خدِّي ماداقتنيش
كل همومي لحظة بلحظة
نسيتها معاك
وانت ف حضني
كل خطاوي العمر معاك
راح اخطيها
تاتا .. تاتا
.....
منى الغريب
