لما شوفتك في المنام

انا لما شوفتك في المنام

بعد اما صليت العِشا

مدِّيت إيديا للسلام

والقلب رفرف م الفرح

وف لحظة م النور انتشى

والصدر م البهجة انشرح

انا شوفت نور

وجريت عليه

حققت فيه

الوشّ نور

والبسمه فوق الشفتين

بتشعّ نور

والكفّ نور

ماقدرت افتَّح بالعينين

من طلِّتك

...

كل الحروف اتخشِّبت

تاه م اللسان كل الكلام

وقوام ..قوام

شاورت إيديا ليك عشان

تشفع لنا يوم الزحام

كان جوه منِّي كلام كتير

وسنين ذنوب

الضهر من شيلها انحنى

أنا  الفقير

والـــ مستجير

طمعان في رحمة ربنا

نزلت دموعي وعبَّرت

ع اللي قاسيته ف دنيتي

مع اني زورتك في المقام

وهناك صارحت بشكوتي

حسيت صحيح إن بإيديك

الطاهرة مسحت دمعتي

....

أنا لما شوفتك في المنام

كل الخلايا نوَّرت

صليت عليك وبالسلام

أحزان ضلوعي اتبخرت

وصلاتي صارت ع الدوام

في القلب نغمة اتكررت

وكأني إنسان من جديد

نظرة حياتي اتغيرت

وهااعيش في دنياتي سعيد

كل الهموم اتيسرت

مابقيتش انا في الكون وحيد

بذكري ليك نولت المنى

وف صلاتي باستزيد

صلى عليك رب البشر

كل الملايكة والعبيد

.....
منى الغريب

ومشيت

ومشيت

واتسرسب كل النَفَس..

الباقي ف صدري

وف لحظة..

الروح قامت حرب على البعد

وتشد النبض المتخبي

جوه عروقي

بصيت ورا منك م الشباك

والقلب هناك..

لساه متعلق جوَّه الجوف

وخيالك بيغيب ف عنيا

تتسِحب الروح من جوايا

ولغاية..

آخر لحظة ف بُعدك

لما تهلّ عليا واشوفك

وتحسس إيدي على ملامحك

واطمن إنك  هوَّه بجد

مش طيف بيلاعب ف خيالي

من خوفي عليك

وتاخدني ف حضن ..

مالوش آخر

والبوسة تزغزغ ف خدودي

وحدودي باشوف

الدنيا تنوَّر حواليا

بمجرد بس مااشوفك جنبي

وايديك..

بتطبطب على قلبي

فتردّ الروح..

اللي مفارقاني بجد

من آخر يوم ف أجازتك

والضحكة اللي بتملا عيونك

لما بنضحك ..

على حلْقةِ شعرك

فاكر تسريحته زمان

واكياس الجيل هناك بالكوم
ومحيرها معاك

ووقوفك تلبس بالساعة

وتزهَّق كل المرايات

فينادي عليك اصحابك

يالا ...اتأخرنا

الفيلم خلاص قرب يخلص

تخرج ومحوطاك دعواتي

يحميك المولى بكل طريق

وما تِغمَض عيني الا اما تعود

يطَّمن قلبي خلاص وينام

طوِّلت المرة دي غيابك

وسهادي مطول بالأفكار

والدمعة مانشفتش ف عيني

من قلقي عليك

والدعوة مافارقتش لساني

ليك واصحابك..

ورا كل صلاه

يحفظكوا المولى ويحميكوا

ويطمِّن ف قلوب أهاليكوا

واما اسمع صوتك في وداني

بألقاني

بسابق نفسي على الشباك

وعنيا تدوَّر بين الخلق

يمكن ورا واحد جاي هناك

أو جايز عند البقال

بيجيبلي الكونو اللي بحبه

ويرجّع شوفي لعيني الدمع

والشلتة النايمة على الكرسي

بتشد ف قلقي  وتمسح فيه

وايديا للمولى ارفعها

والقلب متبِّت في الدعوات

....

 منى الغريب