عتاب عشاق

يا صباح الخير

اسمعنى كده

طب عندي سؤال

وجاوبني عليه

وبقولك ليه ..

بتخبي النظرة اللي ف عينك

علشان بحنانها محوطاني

ولفين ما بروح

وتداري  ف دمعة انا بلمحها

تتمرجح من بين الرمشين

لجل ما ترجع تاني النني

ولا شوفهاشي..

بالوجد تبوح

وترجع تاني..

وتلم عليك كل احبابك

عيني السهرانه

ف قلب سهادها

اللي مطول قول من شهرين

فتافيت الضحك المتبعتر

جوه ضلوعي..

المليانه جروح

وضلوع مشتاقة لبسمة شوق

لجل ما نبضات القلب تروق

وتضخ لقلبك بس

حنين

وتداري ايديك المشتاقة

للمسة إيدي

أحسن مراسيلها المحتارة

بيني وبينك توصل للروح

وتمد خطاوي البعد هناك

وتعافر لجل ماتنساني

وتنسى طريقي

وف عز البعد..

الاقيها بترجع لشطوطي

وتلاقي ما بيني وبينها كلام

وتوافق على كل شروطي

مايكونش مابينا أي ملام

ننسى الهجران

ويا الأحزان

كل اللي مابينا

بس وفاق

عهود ووعود

وعتاب عشاق

......

 منى الغريب

كان عذرك ايه ؟!!!

 

قضيت معاك أيام كتيرة

من الشقا

وبنيت معاك بيتنا

اللي كان بالنسبة ليك

حضن اللقا

كات وقفتي

وياك محبة

مش وداع

كانت ايديا ليك سند..

والكتف زاد

مليان وداد

والروح سكن

سنين طويلة م المحبة دوقتها

لا بخلت يوم

في فيض مشاعري

وحوشتها

ولا قولت نبع الحب جف

ولا من جفا قلبك ف ضاع

حبي اللي كان بيشجعك

وعليت لفوق

دلوقتي بتقول ..

انه بالنسبه لي طوق

وقيود ف ايد

ونسيت مشاعري

وكل لحظة عيشتها

ف احضان هواك

عينك خلاص راحت بعيد

ونسيت ملامحي وبسمتي

لافت عليك

بالكلمتين والضحكتين

وغمزة من رمش الحياي

وبيعت كل عهود مابينا

وماشترتش

اخر كلام عندك بقى

طب روحلها

وشوف هاتلقى ..

زي حضني عندها

أو يوم هاتسهر للنجوم

 زيي لو اتأخرت يوم

ومابين صلاتها والركوع

تدعي بسلام ترجع لها

وشوف بقى

الفرق بين حبي أنا وبين حبها

بس افتكر ..

انك كده ..

هجرت قلبي برغبتك

يعني خلاص..

مفيش رجوع

حتى ان بكيت

وبعتت قربان الندم

والقلب مليان بالدموع

مفيش رجوع

القلب داوى في الجراح

والعين بكاها مش مباح

قطَّعت كل الذكريات

ونسيت ملامح خطوتك

اسمك مابين شفايفي مر

لا والأمرّ

سألت نفسي مرتين

طب ليه بقسوة جرحتني

كان عذرك ايه ؟!!!

......

منى الغريب

حبك مختلف

بتقول لي حبك مختلف

فين لاختلاف

ده الحب مش محتاج كلام

ولا اعتراف

الحب تعرف قوته

بين القلوب

ولا يوم تخاف

الحب حضن يضمنا

من غير ايدين

الحب همسة تهزنا

فيض من حنين

الحب نور يغمر قلوب

يعلن على كل البشر

مشاعرنا توصل للقمر

والسهد للعين والسهر

والروح بتحضن في السما

تعلى مابين أبعد نجوم

تبني لها قصر من الحنان

مافيش الام

ولا فيه هموم

الحب مش محتاج كلام

الحب شوق

الحب فوق

كل الحياة

لو يوم سكن بين الضلوع

م المستحيل يوم تنزعه

ولا أي موت يقدر عليه

.....

منى الغريب

ف ضلوعك باصلي

ليه كلامك مش واصل لي

ياللي في ضلوعك باصلي

وافرش الشريان حنان

ليه حروف حبك أهات

والسعاده خد وهات

مكتوبالنا نعيش ساعات

بعد ايامنا الحزانى

تفتكر  بعد اللقا 

هايهل هجر

تفتكر اشواق هوانا

طرح فجر

تفتكر بعد اللي

قولناه في الهوى

باسألك هو اللي عدى

ألف عمر

خوفي نبضة جوة قلبي

مهما احب وقولت اخبي

تفضح النظرات عيوني

تنطق الأشواق بحبي

هات ايديك يالا وعاهدني

ع المودة والغرام

بجناحات الشوق واعدني

مافي يوم يصحى الخصام

دفي قلبي بحب عمري

همستك صرخة هيام

.....

منى الغريب