أنا خايف

أنا خايف

ومش عارف
حياتي اتخذ لي قرار
ده أنا المسجون
وأنا المطحون
مابين ضرسين
عذاب ومرار
وأنا المربوط على بطني
من الحرمان
جميع لحجار
صحيح عايش على أرضك
ومش رافضك
وجوة القلب قايد نار
وأنا المحروم من الضحكة
من الفرحة ،
تعدي جوه شراييني
بُكا عيني
يسيل أنهار
وتيجي عنيا ف عنيكي
والاقيكي
مفيش ولا مرة حساني
وشايفاني
ولا اديكي تطبطب يوم
على جراحي
وابات صاحي
عشان عينك تنام ..ترتاح
وادوق أحزاني جوايا
عشان قلبك يزيد أفراح
وباغزل م الهموم توبي
ومكتوبي
أعيش مخنوق ف أرض براح
وأغمض عيني واحلم لك
أمل جاي لك
وجناحينه هَنا وفرحة
واشوف البسمة في شفايفك
واموت جنبك وانا مرتاح
……
منى الغريب

كل القصايد

اقفلوا كل القصايد

قطَّعوا كل الورق

نعمل ايه بحروف قصايدك

لما سورية بتتحرق

الحروف مش دي السفاين

اللي تحمي م الغرق

مصمصت كل الشفايف

هلفطت كل الخِلق

زي مايكون مش قصادهم

ألف حلم بيتسرق

                                                                           ...

منى الغريب