مشتاق ..
والشوق فايض بيَّا
مش عارف إيه
عامل فيَّا
الفكر ملخبط أحوالي
والخوف محاوطني
شمال ويمين
لا انا عارف أعبر
إيه مالي ؟
ماعرفش ازاي ؟
ولا فين ؟
ولا مين ؟
هو انت صحيح ..
ماانتاش جنبي
دانا كنت ..
بكلم فيك ساعتين
وامبارح متغدي معايا
وطلبت الأكل ..
ف غمضة عين
لا .. ماتهزرش...
اتكلم مرة معايا بجد
وانا لو تسمحلي
ماقولش لحد
لا هاقول بيخاصم
وباصالح
ولا مرة ف مرة
يزعلني
وقلبي يسامح
ولا قسوة قلبه
بتكويني
ولا طيفه ف بعده
قصاد عيني
ولا إن خياله
ف عز النوم
بيشاغل ..
بؤرة تفكيري
والسهد بيخلق
فيَّا هموم
وعيونه الخاينة
هناك تسرح
في عيون غيري
واسأل نفسي
قولي يا خايبة
طب ليه القلب
بيتشعلق
ف احبال دايبة ؟!
ماتفوقي بسرعة
ويالا انسيه
بما انك بالنسباله
غايبة
فترد تقول
راح ألملم جرحي
وأعالج فيه
والروح والعين
والقلب خلاص
هايلموا الشوق المتبعتر
جوه ضلوعي
في الفلا هارميه
وراح أعمل حزب
ف قلبي عليه
وهاوصي عيوني
بكل الشوق
تسهر لياليه
وهااوصي الفكر
يشاغل فيه
ولحد ف لحظة
ماييجي لقلبي
ويترجاه
ويقول شبيك
والخطوة لرجليه
بتشده
وبتجري بسرعة
وتتوقف
قدام البيت
وينادي لحد
الصوت مايروح
علشان القلب
يحن إليه
وب كلمة يرد
بقسوة عليه
صدقني خلاص
مابقيتش بتسري
في الشرايين
مابقيتش تسهَّر
دمع العين
مابقاش القلب
يدق بحبك
جوَّه وتين
مع ألف سلامة
مفيش إحسان
ولا جوَّه ضلوعي
يطلّ حنان
ولا عادش لحبك
جوَّه ف قلبي
أي إيمان
ونسينا خلاص
وبقولك إيه
م الآخر كده
مااحناش ناقصين
.....
منى الغريب
ليست هناك تعليقات:
إرسال تعليق