لسَّاك مستني
تعدِّي عليك
ترميلك..
فتافيت نظرتها
توصِل لك
حبل الود عشان
تفضل متعلَّق
ف خيوطها
وتسرسب
من شرايينك
بوح
ف يرجّ الروح
ترجع تنساق
ورا ضحكتها
ضحكتها ماهيش
للقلب حجاب
ولا زار...
هايطلَّع من فكرك
طيفها القلَّاب
ضحكتها سراب
بمجرد ماتغيب...
عن عينها
هاتلاقي ..
عيون غيرك تانيين
هاتقابل...
غيرك شوق وحنين
هاتسلِّم برموشها السودا
وهاتحلف...
ولا مليون حلفان
عايش في القلب
و جوَّه الروح
وانت المجروح
متعلَّق في حبالها الدايبة
وهي الخايبة
عمَّالة تشاغل في قلوبهم
بكرة الأيام هاتخلصلك
وتقابل قلب...
يكون صوَّان
تسهر له الليل...
سهد وحرمان
تتعذِّب من بين شرايينها
وبسمتها هتتكفِّن أحزان
أقرب أحلامها...
هاتهجرها
الحب خلاص
مش في الإمكان
راح ينشف...
جوَّه عينيها الدمع
والقلب خلاص
مفيهوش إحساس
إياك وقتيها...
تمد إيديك
تحضن مشاعرها...
المتْداسة
على ألف رصيف
إياك تزرع ..
جوَّه ضلوعها
أزهار لربيع،
ضلَّاية لصيف
إيَّاك تتملَّى ف نظرتها
نظرتها خلاص
عنوان الزِّيف
م الآخر
راح اقول لك كلمة
تسمعها وتتصبَّر بيها
الحب هيصبح بينكوا
محال
....
منى الغريب
ليست هناك تعليقات:
إرسال تعليق