غربتي كات غصب عنِّي
بعد توهت نفسي منِّي
كنتِي جوه عيوني
ننِّي
كنتي أقرب ليَّا منِّي
كل ما بيهدُّوا با بني
كنت شايل لك حمولك
كنت فعلك قبل قولك
كنت نبضة دق قلبك
كنت سايبك
تمرحي مابين ضلوعي
حتى جوعي
ف يوم نسيته لجل خاطرك
ياما قلبي عاش ف ضلك
ياما قال لك
إن قلبي نبضه إنِّي
يعشقك في كل لحظة
مش ملاحظة
إن خيرك مش لكتفي
وإني باهتف لك بإسمك
لمَّا شق الخوف شفايفي
وإن نهرك جف نبعه
بعد ماكان نبع حرفي
وإن صدرك ضاق بحبي
صد إحساسي وعواطفي
ليه ياغاليه
تنطفي فيكي شموعي
ويوم رجوعي
ماالتقي حضنك سكن
ياترى عايزاني تاني
ولَّا في أحضان بعادك
هامشي ادور عن وطن
..................
منى الغريب
ليست هناك تعليقات:
إرسال تعليق