جديد

28‏/10‏/2017

أنا مش جبان





ماتعيطيش

وماتفتحيش ..

للدمع سكة ع الخدود

وماتلبسيش يوم السواد

هنا ع الحدود

القلب مايعرفش خوف

أنا والولاد

واقفين أسود

لكن إيدينا ع الزناد

والعين مصاحبة للسهاد

ومفيش حدود للتضحية

والروح تهون

100 ألف روح ترخص كمان

وأنا مش جبان

ولا يوم هاكون

وماتعرفيش

إن الجبان

هو اللي بايع آخرته

تتمد إيده بالسلاح

غدر وأذى

انا مش جبان

ولا يوم هكون

مين اللي قال

إن الحياة ملك لبشر

يحكم ويؤمر مين يعيش

أو مين يموت

مين اللي قال

العين بيعميها البصر

وان البراح جوه التابوت

مين اللي قال

الناس هاتقتل بعضها

والعدل ف ايدين الطاغوت

العدل ده اسم الإله

والظلم بينا محرَّمه

ربَّك وهايرد الحقوق

يوم القيامة هايكرمه

وشوف بقى كرم الإله

الجنة بيت المظلومين

والنار مكان كل الطغاه..

....

منى الغريب

25‏/09‏/2017

شبرين ...





يادوب شبرين
ورجلين الألم تصرخ
مانيش قادر
وكف الهم فوق كتفي
وباسند إيدي ع الأيام
تعدي قوام
تمد ايديها تحضني
تطمنني
تلملمني
وانفض ضحكتي م الخوف
واخاف منه ليلحقني
يعدي بين رموشي الحلم
وشادد حلم جاي وراه
فيتغطى بألف كابوس
واخطي الخطوة تبعدني
وتهرب مني ١٠٠ خطوة
وإيه يسوى
بكايا ساعات
ودمع العين ..
ماينزلش
مايغسلش
الهموم من الجوف
ولا يداوي الجراح م القلب
فتصرخ نبضة الشريان
ولما تتولد فرحه
واحس بشوقي جوايا
يادوب شبرين
يطل الخوف
ويخطفها
................
منى الغريب

15‏/09‏/2017

خروج الروح




لحظة خروج الروح
على درب الوجع
بيسيل مرارها
فوق مشاعر حرف
ملفوف بالشجن
أنّ الكلام فوق السطور
بدر البدور
تاهت من الشاطر حسن
تاهت معاها الأسئلة
والمشكلة
إن القلوب
سكِّت على الحزن
البيبان
وان الألم فاق الحدود
ولا في الوجود
مخلوق يطيق
يسكن موات
ضاق البراح
في الأوردة
صار انتظار
الموت صعيب
لفّ السواد كل البدن
والروح كمان
والشمس غابت
فوق براح
كل الضلوع
صبحت دموع
كل الرموش
سيل وانهمر
فاتلخبطت
كل الصور
والعتمة غطت
ع البشر
دابت وشوش
العاشقين
كل الرموش
تاه ضحكها
بعدت إيدين
عن بعضها
صبح الفراق
هو القدر
والحلم أصبح ..
م المحال
......
 منى الغريب



خلاص ماشي




خلاص ماشي
ودمعي ع الخدود بيسيل
لا ليل سهدي
يطفِّي جوه قلبي النار
ولا عيني مكفيها الدموع أنهار
مفارق بعد شوف عيني
الحبايب ليه
ورايح أرض مزروعة النهار غربة
وليلها مرار
وباسمع صوتك الدافي
يرن ف ودني وسط الدار
مسافر لجل لقمة عيش
هااسيب أوطاني واتغرب
عشان مايكون لي بيت وأعيش
تغيب عني ياقلب أمك
وضي العين معاك هيغيب
وتتلفح نهار قسوة وليل غربة
في أرض مافيها أي حبيب
وبعد ماعيني كت تتملى من رؤياك
وتتدفا في أحضاني
تيجيلي لما اقول إسمك
ف وقت ماينطقه لساني
خلاص ماشي
وتفضل نبضة في ضلوعي
تعيش خايفة   ... إليك بتحن
ماتنشف م البكا دموعي ولا ثانية
وتحبس بيها أيامي ماتمشيشي
واحس بغربتك بتدق في  الشريان        
يئن وريد
يسيل الدم فوق خدي
وبيضيع الأمل مني
عشان قلبي ماطمنيش
شكالي دولابك الفاضي
من الهجران
وشنطة كلها هدومك
كويت فيها٣ قمصان
وجزمة يتيمة محرومة ..
من الورنيش
وحتة جبنة محشورة في
كسرة عيش
ولقمة فول
وابوك ساكت
وعينه م الدموع بتقول
ياأول زرعتي ف عمري
يانبته جدرها ف صدري
أنا خايف عليك لكن.....
لساني بالدعا حواليك
وقلبي ف كل صلواته
بتتمنى السلامة ليك
خلاص ماشي ومفارقنا
بحفظ المولى والدعوات
هنيجي نوصلك برضو
لحد الشط والمركب
ونستنى هناك لحظات
ونطمن عليك تركب
أتاري البحر مد قواه
وموجه العاتي كان بينا
يادوبك غيبت عن عينا
سمعنا صرختك جواه
في لحظة العقل منا تاه
ضنانا فين ؟
ورد لنا الصدى موته
ماصدقناش
سألنا عنه موج البحر والمية
رمى لنا شنطته ع الشط
صحيح قمصانه مكوية......  
ومبلولة
ونص اللقمة مقسومة
ولسة نار سؤال بتقيد
ضنانا فين ؟
ماجانا رد 
..........
 منى الغريب