عمر

 

ضِحك لي مرة القدر

وقال لي جاي لك "عمر"

ملاك في صورة بشر

سجد الجبين لله

....

انا طِرت من فرحتي

ملِت الزهور دنيتي

اسمُه صبح رقوتي

من بعد كل صلاه

...

حطِّيته جوّا القلب

ودعيت وقلت يارب

في البُعد أو في القرب

جوّا الوريد بالقاه

.....

دمّه عسل شربات

ولَّا عليه شقاوات

وان عدَّى يوم أو فات

ماشُفته.. مش حاسباه

........

ده ملاك ومش إنسان

الضحكة منه جنان

حضنه ده كله حنان

رب احفظه وارعاه

.....

يا تيته بيقول لي

وبإيده يشاور لي

أجري عليه وكلي

قلبي وروحي معاه

 .....

منى الغريب

ملعونة

 

 

ملعونة اللقمة ان كات هتذل

وتطاطي ف يوم راسك للكل

ملعونة ولو  كان فيها حياة

رافضاها انا لو ايدي هتتشلّ

...

ملعونة الضحكة لو اشحتها

ملعونة الطيبة وغباوتها

ملعونة البسمة وشفّتها

لو  مش من جوا القلب تطلّ

...

ملعونة الكلمة ان كات زايفة

بمشاعر  كدَّابة وخايفة

ملعونة خيانتك وقساوتك

بتخلي الحب ف قلبي يقلّ

...

ملعونة عشانك أيامي

لو   طيفك عدَّا ف أحلامي

ملعونة العين لو هتشوفك

أو حتى لقمرة ليلي تهلّ

...

 

ملعون لو كفِّي لمس يدَّك

أو إيدي تطبطب على خدَّك

ملعونة يا قسوة ضلعينك

لو على حنيِّة قلبي تغِلّ

...

ملعونة ومش عايزاها حياة

لو كانت من أنفاسك ... لا

ولا عايزة القلب يدق معاك

ولا عقلي  بخيبته وراك يختلّ

***

منى الغريب

جرح قلبي

 

 

هاسند بإيدي على اكتافي

خلاص ماعدتش مجدافي

ولا مرة هاحتاج لك فيها

..

أحزاني لازم أفرَّحها

والدمعة على خدي امسحها

بإيديا واكتم معانيها

..

ولا يوم تشوفها وتتشفَّى

ميزان حناني مالوش كفَّة

خلاص عواطفي هااخبِّيها

..

والقسوة تبقى اللي ف قلبي

من بعد اخلاصي وحبِّي

هاقفل بيبانها و أعيش بيها

..

مابقاش في قلبك إخلاصُه

بإيديك على جراحي وداسوا

فَقَدِت مشاعرك معانيها

...

ما لغيري غيَّرت الدفَّة

لهواها تجري وتتكفَّى

طبع الخيانة مقوِّيها

..

تِعبان ولايف على حيَّة

ميِّت ف قلبي مالوش ديَّة

لفِّي الشباك قوي  لِفِّيها

..

فيه فيديوهات رايحة وجاية

ع الواتس بينكوا بحنِّية

عبِّي ف خيانتك واسقيها

****

 منى الغريب

قلبي انكسر

 

قلبي انكسر لمَّا

روحتوا وفوتُّوني

فين راحت اللمَّة

والضحكة والبسمة

رُدُّوا وجاوبوني

..

مابقاشي غير الضلمة

والحُرقة جوَّا القلب

والدَّمعة ف عيوني

..

قلبي انكسر يابا

راح السَّند والضَّهر

دنيا بقت غابة

والرُّوح سِكنها القهر

..

كات قوِّتي مِنَّك

ولا خُفت مرة ف يوم

يوم ماابتعد عنَّك

بتشيل قصادي هموم

..

دلوقت يابا النَّاس

أقرب ماكان ليَّا

بقى قلبهم برصاص

بينشِّنوا عليَّا

..

حتى الغريب ندهوه

واتلمُّوا حواليَّا

وبينهشوا ف قلبي

ماعادش فيه إخلاص

وعرفوا إن خلاص

قلبي مالوش ديَّة

..

قاموا قطَّعوا الشرايين

واتسلُّوا بضلوعي

ياروح ملانة أنين

يكفاكي يا دموعي

..

 

آه يامرار الريق

وقهرة الأحباب

فين يابا أوفى صديق

كله طِلع كدَّاب

..

قلبي انكسر يابا

كسرة ماليها جبر

هافضل كده لمَا

يجمعني بيك القبر

.................... 

منى

يادنيا مالك ..

 

يادنيا مالك كده

واخدانا كام لفة

مابين دموع والام

وعيون ماهيش شايفة

يا دنيا مالك بقى

مالناش مكان فيكي

طول عمر طوق الشقى

على الرقاب محطوط

ملفوف ٢٠٠ لفة

ولا يوم اعيش مبسوط

ولا ضحكة تملأ العين

طول عمر قلبي حزين

درب الحبايب ضل

وصل الطريق آخره

وادي آخر اللفة

......

منى الغريب