كل يوم بيجيني صوتك
أحلى من كل الأغاني
جوَّه قلبي طعم تاني
قولي يا امَّه
رب ما يحرمني حسِّك
كل نظرة من عيونك
قلبي حاسِّك
قبل ما ينطق لسانك
عمري كله
يفتدي لحظة حنانك
لو يكون الكون في كفة
ودعوة منك بتقوليها
راح تزيد كفِّة دعاكِي
يسوى إيه الكون بحاله
لو هاكون يوم مش معاكي
لمسة منِّك... فوق كتافي
تنفتح أبواب سمايا
يا هنايا
ويا هَنا قلبي برضاكي
قبل ما افتَّح عيوني
كل نبض ف قلبي عارفك
قبل ماتميِّز جفوني
نظرتك بتدفِّي روحي
لما تبقي قصادي شايفك
وان تغيبي
بالبُكا تغرق خدودي
وايه يكون معنى لوجودي
لو ف لحظة بعدتي عني
.....
عارفة ياامَّه
خطوتك في البيت دي حِنَّة
دعوتك في الفجر جنَّة
ويا ما جالنا
م الزمان أيام عصيبة
وكنتي دايما
بابتسامة تعدِّي بينا
فوق تلال الهمّ كنتي
مدنة لينا
كنتي ربَّان السفينة
ف بحر خُوفنا
لو ف يوم الموج خالفنا
كف ايدك بين ايدينا
لما نوصل شطّ لينا
قولي ياامه
انا بين ايديكي
وان همستي تنادي اسمي
روحي تجري اوام عليكي
والنصيحة ف قلبي دايمًا
تتحفر جوَّه ف وريدي
يبقى عيدي
ف عمري يا امه
لما بيقابل صباحي...
دعوة منك
كل خطوة ليها اخطي
كل ما بامشي واخطي
وكتاباتي كمان وخطي
دعوتك سابقة الخطاوي
ياااه يا أمي
ضمِّتك ليَّا ف نجاحي
طعم تاني
طعم متغمس بفرحة
مش هالاقي بين حروفي
وصف ليها
لو لـكل سنين باخطِّي
خطايا طارحة
من دعاكي
عايزة حاجة منِّي تاني
والأماني
اللي ياما سمعها قلبك
نفسي يامّه لما اكبر
ابقى زيِّك
ابقى لجل عنيكي
حارس
وابقى فارس
امسح الدمع
اللي بيفكر يهوِّب
يوم لخدِّك
واحضن الضيّ اللي طارح
كل ليلة ف نن قلبك
يااااه يا امي
وبخدودي
امسح الأرض واعطَّر
لجل تمشي
واغزل الضلة لعيونك
فوقها رمشي
بس قولي...
اسمعها منك
ولَّا شاوري
بطرف عينك
روحي تركع
بين ايديكي
عايزة أي حاجة منِّي
قولي ياامه عايزة إيه ؟
عايزة نجم الليل اجيبه
نبض قلبي
ليكي اسيبه
روحي..عمري
لجل خاطرك
عايزة حاجة منِّي تاني
والأماني
اللي ياما سمعها قلبك
نفسي يامّه لما اكبر
ابقى زيِّك..
ابقى زيِّك !
......
منى الغريب
