- عايزة اكتب له...
واقول له مشاعري
- إيه كان حايشِك؟!
- مش لاقية كلام ابعتهوله
- ويصحِّي النوم جوَّه عيونه
ويحنِّن بيه قلبه القاسي
وبافكَّر فيه والقاه ناسي
وباشوفه بعيني و مايشوفنيش
رغم ان الشوق باين فيهم
وكإنِّي قصاده شوية ريش
متْبعْتر على كل طريقه
وعيون بتشاغل من حواليه
- اتصلي عليه وأكيد هايردّ
- كلمته يادوبك
قولت : ألو
- راح قايل : ليه اتأخرتي
وبكلِّم فيكي من ساعتين
ومفيش إحساس...
يالَّا و ردّي
الكلمة ف حلقي...
خلاص وقفِت
وحروفي نسيتها...
مع زعِيقه
العقل اتلخبط جرْي وتاه
وانا أول مرة يا ولداه
يسمع صوتي ولَّا أتكلم
بصِّيت ع النمرة...
ف تليفوني
الأرقام هيَّ ومظبوطه
جمّعت شجاعتي...
قوام قررت
وطلبت النمرة كمان مرة
وقولت: الووو
فقابلني بصوت هادي
وقال لي:
انا آسف فكرتك اختي
مستنِّي تعدِّي عليَّا
عشان
تبارك لي
لإنِّي الليلة عريس
....
منى الغريب
ليست هناك تعليقات:
إرسال تعليق