سلام الله عليك ياللي...
فارقت الجمع
عنينا م البكا نشفت
ولا عاد فيها...
ريحة الدمع
تهلّ علينا في الندوه...
يهلّ النور
تطبطب إيدك الحانية
على كتافنا...
بكل سرور
وتسأل عننا دايما
وتطمن على حالنا...
وأحوالنا معانا إيه
ولو تعرف فلان غايب
تقول: تليفونه ياجماعة
هنطمن بسرعة عليه
طريق ندوتنا...
بيزينه خطاك دايما
ونسعد لما تنشدنا...
ويحلوّ الكلام دايما
لإنه كان على حبيبنا
لسانك ذكر وعباده
قصايدك هادفه وزيادة
ورغم انك بعيد عنا
في مشوارك
إلا إنك...
بحُبّ النادي واصحابه
تقول انك... مابين الأهل والعزوه
وقاعد في صالون دارك
وبنتابعك...على الصفحة
وكنا نحب نقرالك
ونسعد بيك هِنا لما
بنسمع كل اشعارك
وتدمع عينا لو تنشد
ويعلا عزف أوتارك
وغيبت صحيح
فارقت الصحبة واللمة
لكن ذكراك
دي جوه قلوبنا مابتغيب
عشان أخلاقك العالية
وقلبك بالمحبة رحيب
ومين هنقول له سمعنا
وفي مدح الحبيب هايطيب
يارب الكون بندعيلك
وتقبل عبدك الطيب
وتقبل منه صلواته
ودعواته
وسجده سجدها
في حياته
يكون في الجنة ونعيمها
......
منى الغريب
ليست هناك تعليقات:
إرسال تعليق