من أول حرف
ف أول سطر
والقلم
الرافض ذله
بيرفض زمن القهر
من أول كلمة
سؤال جوايا
بيحفر حفر
من إمتى الميت من حقه
يصرخ من بعد الموت ؟؟
من امتى يبان الحق
ف زمان مشنوق؟؟
عاش عمره
وبصوت مخنوق
قال جاي يتحرر بعد مامات
وحتى ان مات
مين بعد الموت
راح يزرع همسة صوت
ف قلوب مظلومة
مين هاينادي الشمس الدافيه
ف عتمة ليل
والناس محرومة
مين هايصدق ان حطام البيت
كات في الأصل
حيطان مسمومة
ماتت جوه قلوب الناس
أحلام مكتومة
صرخت
جوه حدود الخوف
ويارييت بتشوف
طب إمتى الناس
ف تياب الحلم تنام
امتى العين
هاتلاقي قصادها براح
ويغمض فيها الرمش السارح
فوق أنهار الحلم الأخضر
مهما ان راح
يا نجوم الكون بصي لي
ونوَّري ليلي
وافردي توب الفجر قصادي
تقيد قناديلي
وابعتي كل طيور الكون
تنشد مواويلي
مهما ان طال الظلم ف جوفنا
مهما ان عشش فوق شفايفنا
كلمة حق هاتطلع منَّا
حتى ان موتنا
راح يفضل حلمنا طول العمر
طول العمر
*****
نور الحرف
منى
ليست هناك تعليقات:
إرسال تعليق