جديد

01‏/12‏/2015

يالا تعالى


  


واقف فى الشباك باناديلك

أنا باستنى يابابا وصولك

توصل بكره ، توصل بعده

مش هااتحرك من غير قولك

و المدرسة مش عايز اروحها

غير وأنا ايدي ف حضن إيديك

ودروسي امتى هاتشرحها

وبعد مااحلُّ اجري واوريك

مين يلاعبني بعد ما اذاكر

مين هايجيب لي لعب وحاجات

مين هايقول لي حبيبي يا شاطر

وهايمضي لي على الشهادات

مين هاياخدني معاه النادي

ويشجعني ف لعب الكورة

مين هايطبطب فوق أحزاني

ويطلعني ف أجمل صورة

مين هايقف لي ف ليلة فرحي

ويمد ايديه للمأذون

مين هايوصي عليا عروستي

تسعد قلبي فين مايكون

.....

بابا الدنيا ف بُعدك صعبة

ولا بيخبط ع الباب حد

هو بعادك عننا لعبة

مهما بانادي مش بترد

ماما دموعها بتخبيها

لجل مااشوفهاش فوق الخد

كل ماتقفل بابها عليها

اسمع صوتها بتبكي عليك

واما اسألها تدراي عنيها

وتقول  ربي يبارك فيك

أنا مش عارف بس يابابا

امتى هاتيجي الله يخليك

بدموع عيني يابابا بانادي

يالا تعالى أنا مستنيك

....

منى الغريب

ليست هناك تعليقات:

إرسال تعليق