لو هاانادي ألف مرة
مش هايوصلكم ندايا
دي الحياة حواليا مُرة
وانتوا اصلا مش معايا
بابا اصحى عايزة ابوسك
جوه حضنك واستخبى
وبايديك الدافية طبطب
فوق همومي حبة حبة
مين يصد معايا خوفي
لو رياح اليتم هبَّة ؟
مين هاينصحني ف حياتي
جاية كل سنيني صعبة
......
وانتي يامَّا ياللي قلبك
منبع الحب ف حياتي
كنتي روحي ونور عيوني
كنتي أجمل ذكرياتي
كنتي من نومك تقومي
لو ف عز الليل عشاني
حلمي مايحلاشي إلا
وصوتك الدافي ف وداني
غبتي عني وف عيوني
كوم دموع والقلب خايف
بعد منك مين يطبطب
مين دعاه ملو الشفايف
......
......
رد يابا... قومي يامّة
قلبي مش عايز يفوتكو
دي الحياة بعديكو ضلمة
جبت فرشي ونمت بينكو
روحكوا هاتزيل أي عتمة
وان بردت أحضن ترابكو
وان بردت احضن ترابكو
...........
منى الغريب
ليست هناك تعليقات:
إرسال تعليق