جربت تمد إيديك للنور.....
ف شعاع الشمس
جربت ف ودن الليل الهمس
جربت تعيش من غير أحلام
جربت تنام
متكتف رمشك
تحضن فيك كل الأوهام
أو بين سراديب الخوف
مش لاقي طريق
متكعبل بين أحجار الزيف
ورمال اليأس
جربت وقوفك في الممنوع
وسنين هربانه ..ليالي حنين
وماليها رجوع
متشعبط فوق ضلعي الموجوع
وأنين يتحس
جربت تطبطب على أحزان..
الناس بضمير
جربت تطير... بجناح مكسور
بين حلم كسير
وقمر مخنوق
والنور محبوس
في ضلام النفس
جربت الحضن بنظرة عين
بين لمس ايدين
وحنين يتغذى على الأشواق
جربت تحب....؟
وتسيب القلب يدق
ويخضر في النبضات
هاتشوف الكون حواليك
أجمل مايكون
هاتلاقي جميع أحلامك
صبحت حلم جميل
بتشوفه حقيقي بأروع لون
لكن بتعيشه ف أجمل ليل
ويجيله نهار
يظهر له ف فجرك
ألف دليل
إنك بتحب....
.................
منى الغريب
ليست هناك تعليقات:
إرسال تعليق