مابين قلبي وبين قلبك
بحور وبحور
مراكب قلبنا تحبي
بلا مجاديف
شراع
مبتور
تمرجحنا مابين الموجة
والموجة
ف حلم كفيف
شراع قلبي عملته توب
بيحمينا من النوات
نداري بيه ضلام ليلنا
ونتغطى ف عز الفجر بالأحلام
وليه يا حلمنا المكشوف
بتدِّي الخوف عناوينَّا
وليه/ كل الدروب بيننا
ضباب بيطوف
على شوفنا
سنين مخنوقه بالممكن
وبالممنوع
سنين ضلمة ... تكعبلنا ....
توقعنا....
على سكة مافيها شموع
ده غير الحزن والحسرة
على أيام ماليها رجوع
وعدَّى ع السنين عمري
فَرَش غيمة على صدري
وقال دي نهاية الرحلة
بحور لمَّاعبرناها
مايوم
قابلتنا نهايتها
وجوَّه هوجة الأمواج
رمينا فيها قصتناو..
حكايتنا دي دوامة
لكل مراكب العاشقين
وبنقول مين
هايبعد عنا أحزاننا
وأيامنا
يبدِّلها
لفرحة ونجمة في العالي
بتتبسم ف قلب الليل
*******
نور الحرف
منى
ليست هناك تعليقات:
إرسال تعليق